To‘qayev 2029 yilda lavozimidan ketishini rasman tasdiqladi

Qozog‘iston prezidenti Qosim-Jo‘mart To‘qayev o‘z lavozimini 2029 yilda tark etishini yana bir bor ommaviy ravishda tasdiqladi. Al-Jazeera telekanaliga bergan intervyusida davlat rahbari bu qaror xalq xohishi va shaxsiy yetuk pozitsiyasi bilan bog‘liq ekanini ma’lum qildi.

— Men buni avval ham aytganman. 2029 yilda prezidentlik vakolatimni tugataman. Bu — xalqimning talabi va mening qat’iy qarorim, — dedi To‘qayev.

Prezidentning ta’kidlashicha, u davlat boshqaruvini ilohiy mas’uliyat emas, balki xalq tomonidan berilgan ishonch deb biladi.

— Prezident Xudoning elchisi emas. U xalq saylagan va o‘z xalqiga xizmat qiluvchi mansabdor. Qozog‘istonda prezidentlik faqat yetti yil bilan cheklangan, — deya qo‘shimcha qildi u.

Islohotlar — to‘xtovsiz jarayon

Qosim-Jo‘mart To‘qayev islohotlar yo‘lida Qozog‘iston izchil harakat qilayotganini va bu jarayon uzoq muddatli hamda barqaror ekanini ta’kidladi.

— Biz Qozog‘istonni islohotlar mamlakati sifatida yaratishda davom etamiz. Men aminman: milliy manfaatlarimiz uchun zarur bo‘lgan har qanday islohotni amalga oshiramiz. Bu jarayonga hech qanday to‘siq yo‘q, — dedi davlat rahbari.

Eslatib o‘tamiz, To‘qayev 2019 yildagi navbatdan tashqari prezidentlik saylovlarida 70 foizdan ziyod ovoz to‘plab g‘alaba qozongan edi. 2022 yil noyabrida esa “Yanvar voqealari”dan so‘ng yana saylov o‘tkazilib, u 81,31 foiz ovoz bilan ikkinchi marta prezident etib saylangan. Mazkur saylovda vakolat muddati yetti yil deb belgilangan va u 2029 yilda yakunlanadi.

Shuningdek, To‘qayev avvalgi chiqishlarida ham yetti yillik muddat saylovoldi dasturi va rejalashtirilgan islohotlar uchun yetarli ekanini bir necha bor ta’kidlagan edi.

Xulosa sifatida, Qozog‘istonda hokimiyatning o‘zgarishi asta-sekinlik bilan, tizimli va demokratik jarayonlar orqali amalga oshishi ko‘zda tutilmoqda. To‘qayevning o‘z so‘zida turishi esa Qozog‘istondagi siyosiy barqarorlikning muhim belgisi sifatida baholanmoqda. “Zamin”ni Telegramʻda oʻqing!