Moskva va Kiev o‘rtasida davlat rahbarlari darajasidagi to‘g‘ridan-to‘g‘ri tinchlik muzokaralari ertami-kechmi albatta amalga oshadi va bu jarayonda Ukraina tomoni g‘olib chiqishiga ishonchimiz komil, dedi Ukraina prezidenti devoni rahbari Andrey Ermak 29 avgust kuni DW nashriga bergan intervyusida.
«Hozir biz dunyo hamjamiyatidan so‘rayapmiz – Rossiyani muzokara stoliga olib chiqing, shunda ko‘rasiz: biz o‘sha yerda g‘olib bo‘lamiz», — deya qat’iy ta’kidladi Ermak.
Uning aytishicha, Nyu-Yorkda u AQSh prezidenti Donal’d Trampning maxsus vakili Stiven Uitkoff bilan uchrashgan va Kievning Ukraina prezidenti Volodimir Zelenskiy hamda Rossiya rahbari Vladimir Putin o‘rtasida yuzma-yuz uchrashuv o‘tkazishga tayyorligini tasdiqlagan. Bu masala 18 avgust kuni Vashingtonda o‘tgan Zelenskiy va Trampning ikki tomonlama muloqoti chog‘ida hamda Yevropaning bir qator yetakchi davlatlari ishtirokida muhokama qilingani qayd etildi.
«Biz o‘tgan davrda ro‘y bergan voqealarni keng muhokama qilishimiz zarur edi. Ammo afsuski, Vashingtondagi samarali muzokaralardan so‘ng Rossiyadan Oq uyda muhokama qilingan ikki tomonlama uchrashuvga tayyorlik haqida hech qanday aniq signal olmadik. Shu bois, Ukraina tomonining har doim konstruktiv hamkorlikka tayyor ekanini yana bir bor ta’kidlash muhim edi», — deya so‘zini yakunladi Ermak.
Shu tariqa, Kiev Moskva bilan bo‘ljak muzokaralarda faqat diplomatik jarayonni emas, balki siyosiy jihatdan ham g‘oliblikni qo‘lga kiritish niyatida ekanini ochiq ifoda etdi. Mavzu yaqin haftalarda xalqaro maydonda yanada qizg‘in bahslarga sabab bo‘lishi shubhasiz.
“Zamin”ni Telegramʻda oʻqing!
