Kongo Demokratik Respublikasida vabo epidemiyasi jiddiy tus olib bormoqda. Rasmiy ma’lumotlarga ko‘ra, joriy yilning oxirgi 9 oyi davomida 64 427 ta vabo holati qayd etilgan. Kasallikdan 1888 nafar bemor hayotdan ko‘z yumgan. Eng tashvishlisi — bemorlarning katta qismi bolalar bo‘lib, 14 818 nafar o‘smir kasallikka chalingan, ulardan 340 nafari vafot etgan.
Epidemiya allaqachon mamlakatning 26 provinsiyasidan 17 tasiga tarqalib ulgurgan. Eng yirik o‘choqlardan biri poytaxt Kinshasa hisoblanadi. Mutaxassislar vaziyatning keskinlashayotganini, davlat darajasidagi favqulodda choralar zarurligini ta’kidlashmoqda.
Sog‘liqni saqlash mutasaddilariga ko‘ra, vaboning oldini olish mumkin. Buning uchun ichimlik suvi ta’minoti, sanitariya tizimi va tibbiy xizmat sifati yuqori xavfli hududlarda tubdan yaxshilanishi kerak. Kasallik asosan vabo vibrioni bilan zararlangan suv yoki oziq-ovqat orqali yuqadi.
JSSTning e’tiroficha, dunyoda har yili 1,4 million kishi toza suv va sanitariya sharoitlarining yetishmasligi oqibatida vafot etadi. Shu sabab, ayniqsa bolalar yashaydigan hududlarda profilaktika choralarini kuchaytirish juda muhim.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
