O‘zbekistonda yana bir yirik firibgarlik sxemasi ochildi. Davlat xavfsizlik xizmati ma’lumotiga ko‘ra, Farg‘ona shahrida yashovchi 40 yoshli shaxs boshchiligidagi 34 nafaridan iborat uyushgan guruh fosh etildi. Ular o‘z faoliyatini oddiy ofis emas, “call-markaz” ko‘rinishida niqoblab yuritgani bilan e’tiborni tortmoqda.
Guruh a’zolari Farg‘ona va Toshkentda binolarni ijaraga olib, zamonaviy axborot texnologiyalari orqali chet el fuqarolarini nishonga olgan. Tergov ma’lumotlariga ko‘ra, ular Rossiyada dori vositalari va biologik qo‘shimchalar sotib olgan minglab mijozlar bazasiga noqonuniy ravishda ega chiqqan.
Sxema oddiy, lekin ta’sirli bo‘lgan: soxta operatorlar o‘zlarini go‘yoki huquqni muhofaza qiluvchi idora yoki bank vakili sifatida tanishtirib, “sifatsiz dori uchun kompensatsiya beriladi” deb ishontirgan. Asosiy nishon esa keksa yoshdagilar bo‘lgan. Kompensatsiya olish uchun “soliq” to‘lash talab qilinib, fuqarolardan turli kartalarga pul o‘tkazish so‘ralgan.
Natijada jabrlanuvchilardan qariyb 9,6 million rubl undirilgan. Bu milliardlab so‘m degani. Shu bilan cheklanmay, guruhning ayrim a’zolari litsenziyasiz kripto-aktivlar aylanmasi bilan ham shug‘ullangani aniqlangan.
Sud hukmiga ko‘ra, guruhning 21 nafar a’zosi 3,5 yildan 9,5 yilgacha ozodlikdan mahrum etildi. Qolganlarga ozodlikni cheklash jazolari va jarimalar qo‘llanildi. Yetkazilgan moddiy zararni undirish ishlari ham davom etmoqda.
Bu voqea yana bir bor eslatadi: telefon orqali “oson pul” va’da qilinsa, ikki karra tekshirish kerak. Aks holda, firibgarlar texnologiyadan tez, odamlar ishonchidan esa yanada tezroq foydalanmoqda. Bugun birov, ertaga boshqasi — ehtiyot bo‘lish esa har kimning o‘z qo‘lida.
“Zamin”ni Telegramʻda oʻqing!
