Surxondaryo viloyatida sud tizimi bilan bog‘liq yana bir noqonuniy holat fosh etildi. Ma’lum qilinishicha, viloyat sudining sudya katta yordamchisi xizmat mavqeidan foydalangan holda katta miqdorda pul olishga uringani aytilib, 53 ming AQSH dollari bilan ushlangan.
Holat Davlat xavfsizlik xizmati hamda prokuratura organlari xodimlari tomonidan o‘tkazilgan tezkor tadbir davomida aniqlangan. Ma’lumotlarga ko‘ra, sudya katta yordamchisi jinoyat ishlari bo‘yicha Angor tuman sudi ish yurituvida bo‘lgan jinoyat ishi yuzasidan sudlanuvchilar foydasiga “yordam” berishni va’da qilgan.
U 2 nafar sudlanuvchiga nisbatan aniqlangan 6,3 milliard so‘mlik zarar miqdorini qayta baholash to‘g‘risida sud ajrimi chiqarish orqali kamaytirish, ularga ozodlikdan mahrum etish bilan bog‘liq bo‘lmagan jazo tayinlatish hamda dastlabki tergov davrida qo‘llanilgan “qamoq” ehtiyot chorasini bekor qildirishni va’da qilgani aytilmoqda.
Evaziga esa sudlanuvchilarning qarindoshidan 53 ming AQSH dollari talab qilgan. U ushbu mablag‘ni olayotgan vaqtda huquqni muhofaza qiluvchi idoralar xodimlari tomonidan ashyoviy dalillar bilan qo‘lga olingan.
Mazkur holat sud-huquq tizimida halollik va qonun ustuvorligi masalasi qanchalik muhim ekanini yana bir bor ko‘rsatdi. Sud ishlariga ta’sir o‘tkazish, jazoni yengillashtirish yoki ehtiyot chorasini bekor qildirish va’dasi orqali pul talab qilish qonun oldida og‘ir jinoyat sifatida baholanadi.
Hozirda ushbu shaxsga nisbatan Jinoyat kodeksining 168-moddasi 4-qismi “a” bandi, ya’ni juda ko‘p miqdorda firibgarlik, shuningdek, 28, 211-moddasi 1-qismi bilan jinoyat ishi qo‘zg‘atilgan. Ayni paytda tergov harakatlari davom etmoqda.
Tergov davomida ushbu holatga aloqador boshqa shaxslar bor-yo‘qligi, va’da qilingan harakatlar qay darajada amalga oshirilishi mumkin bo‘lgani hamda pulning asl maqsadi huquqiy jihatdan o‘rganiladi.
Bunday voqealar fuqarolar uchun ham muhim signal bo‘ladi: sud yoki tergov masalalari faqat qonuniy yo‘l bilan hal qilinishi kerak. “Pul bersam, ish bitadi” degan fikr nafaqat adolatga, balki odamning o‘ziga ham jiddiy xavf tug‘diradi. Qonundan aylanib o‘tishga urinish ko‘pincha to‘g‘ridan to‘g‘ri jinoyat ishiga olib boradi.
“Zamin”ni Telegramʻda oʻqing!
