Prezident Shavkat Mirziyoyev yoshlar bilan bo‘lib o‘tgan muloqotda mehnat bozoriga har yili 600 ming nafar yosh kirib kelayotganini ta’kidladi. Uning aytishicha, 2030 yilga borib bu raqam 1 millionga yetishi mumkin. Shu bois, yoshlar uchun munosib ish o‘rni topishga sharoit yaratish — davlat oldidagi eng dolzarb vazifalardan biri ekani alohida urg‘ulandi.
Qayd etilishicha, yoshlar o‘rtasida o‘tkazilgan so‘rovnomada ishtirokchilarning uchdan biri tadbirkor bo‘lish istagini bildirgan. Ana shu qiziqishni real imkoniyatga aylantirish maqsadida o‘tgan yili yoshlar bandligini ta’minlash uchun banklar hamda Yoshlar ishlari agentligiga 400 million dollar yo‘naltirilgani ma’lum qilindi.
Ma’lumotlarga ko‘ra, “Yoshlar biznesi” va “Kelajakka qadam” dasturlari orqali 15 ming nafar yosh o‘z ishini yo‘lga qo‘ygan. Bu loyihalar natijasida 50 ming nafar inson ish bilan ta’minlangani qayd etildi. Ya’ni, bir yosh tadbirkor — atrofida yana bir necha oilani ishli qilib qo‘yayotgan “dvigatel”ga aylanyapti.
Prezident yoshlar tadbirkorligini yanada qo‘llab-quvvatlash uchun qo‘shimcha 200 million dollar ajratilishini e’lon qildi. Bu mablag‘lar yangi loyihalarga turtki, amaldagi bizneslarga kengayish imkoniyati bo‘lishi kutilmoqda.
Shuningdek, o‘zini o‘zi band qilgan yoshlar uchun kredit miqdori 100 million so‘mdan 300 million so‘mgacha oshirilishi belgilandi. Yosh tadbirkorlar loyihalari uchun ajratiladigan kredit limiti esa 5 milliard so‘mdan 10 milliard so‘mgacha kengaytirilishi mumkinligi aytildi. Innovatsion startaplar bo‘yicha ham yangi imkoniyat ochilyapti: bunday loyihalarga 100 ming dollargacha investitsiya kiritishga ruxsat berilishi ma’lum qilindi.
Bundan tashqari, servis va umumiy ovqatlanish sohasida 1 mingdan ortiq ish o‘rni yaratgan mahalliy brendlardan franshiza olib, filial ochishni istagan yoshlar uchun ham qulay moliyalashtirish paketlari joriy etilishi aytildi. Ya’ni, tayyor va ishlab turgan brendga suyanib, tezroq natijaga chiqishni xohlagan yoshlar uchun “qisqa yo‘l” ham ochilyapti.
Xulosa oddiy: yoshlar soni oshib borayotgan bir paytda ularga ish, daromad va biznes qilish imkoniyatini kengaytirish — kelajakni hozirdan mustahkamlash degani. Endi eng muhimi, shu imkoniyatlar joylarda ham tez va adolatli ishlab ketishi.
“Zamin”ni Telegramʻda oʻqing!
