O‘zbekistonda yangi ishlanmalarni ishlab chiqarish va ilm-fanning natijalarini tijoratlashtirish maqsadida oliy taʼlim va ilmiy muassasalar asosida “spin-off” korxonalari tashkil etiladi. Bu qaror, prezidentning "Mamlakatda yangi ishlanmalar asosida ishlab chiqarishni tashkil etish tizimini joriy qilish hamda ilm-fanni qo‘llab-quvvatlashning qo‘shimcha chora-tadbirlari to‘g‘risida"gi farmonida belgilangan.
Hujjatga ko‘ra, 2026 yil 1 maydan boshlab, yangi korxonalar uchun qator qulay shartlar va yengilliklar joriy etiladi. Xususan, ularni davlat ro‘yxatidan o‘tkazishdagi byurokratiyani kamaytirish, ustav fondidagi davlat ulushini o‘zgartirish bo‘yicha talab qilingan qo‘shimcha kelishuvlar bekor qilinadi.
Shuningdek, “spin-off” korxonalari muassislarining professorlar, ilmiy xodimlar, talabalar va izlanuvchilardan iborat mehnat jamoasi tuzilishi shart qilinadi. Bu yo‘l bilan ilmiy tadqiqotlar bilan shug‘ullanuvchi mutaxassislarning iqtisodiy faoliyatga qo‘shgan hissasi yuksaltiriladi.
Farmonga asosan, bunday korxonalarga investorlar tomonidan investitsiya kiritishga oid bitimlar va shartnomalarni rasmiylashtirishdagi turli xil cheklovlar ham bekor qilindi. Innovatsion faoliyatni qo‘llab-quvvatlash jamg‘armasi mablag‘lari hisobidan tashkil etilgan korxonalar uchun venchur moliyalashtirishga tenglashtirish qaror qilingan.
Bu qarorlar, o‘z navbatida, yangi texnologiyalarning taraqqiyotiga, taʼlim va ilm-fanning iqtisodiyotga integratsiyasini mustahkamlashga, shu bilan birga yangi ish o‘rinlari yaratishga katta turtki beradi.
“Zamin”ni Telegramʻda oʻqing!
