O‘zbekistonda suv va gazli ichimliklar uchun joriy etilayotgan yangi markirovkalash tizimi vaqtincha majburiy tarzda qo‘llanilmaydi. Mazkur qaror 5 may kuni o‘tgan yig‘ilishda Shavkat Mirziyoyev tomonidan qo‘llab-quvvatlangani ma’lum qilindi.
Ma’lumotlarga ko‘ra, 1 apreldan boshlab mahsulotlarni raqamli tarzda kuzatish — agregatsiya tizimi ishga tushirilgan edi. Bu tizim yirik partiyalardagi mahsulot harakatini nazorat qilishga xizmat qiladi. Biroq amaliyotga joriy etilish jarayoni ko‘plab tadbirkorlar uchun qiyinchilik tug‘dirib, bozor ishtirokchilari orasida xavotirlarga sabab bo‘lgan.
Abdumannop Bo‘riyevning ta’kidlashicha, bozorning asosiy qismini egallagan yirik kompaniyalarning yarmi hali yangi talablarga to‘liq moslasha olmagan. Shu bois tizimni kechiktirish orqali biznes uchun o‘tish jarayonini yengillashtirish maqsad qilingan.
Shu bilan birga, tadbirkorlar tomonidan ko‘tarilgan yana bir muhim masala — jarimalar miqdori ham qayta ko‘rib chiqilmoqda. Yangi takliflarga ko‘ra, ishlab chiqaruvchilar, importchilar va ulgurji savdo subyektlari uchun jazo choralari yumshatilishi mumkin. Endilikda umumiy ovqatlanish va savdo korxonalari uchun jarimalar tushumga bog‘lanmay, qat’iy belgilangan miqdorda hisoblanishi rejalashtirilmoqda.
Bundan tashqari, soliq qonunchiligiga o‘zgartirish kiritish, ayrim holatlarda jarimalarni qo‘llamaslik va hatto vaqtinchalik moratoriy joriy etish masalasi ham muhokama qilinmoqda.
Yig‘ilishda shuningdek, naqdsiz to‘lovlar, kassa cheklari, import jarayonlari hamda mehnat munosabatlariga oid muammolar ham ko‘rib chiqildi. Xususan, ishga qabul qilish va ishdan bo‘shatishdagi ortiqcha byurokratik talablarni qisqartirish zarurligi alohida ta’kidlandi.
Mutaxassislar fikricha, mazkur o‘zgarishlar tadbirkorlik muhitini yaxshilash, biznesga qo‘shimcha qulaylik yaratish va davlat bilan xususiy sektor o‘rtasida ochiq muloqotni mustahkamlashga xizmat qiladi.
“Zamin”ni Telegramʻda oʻqing!
