O‘zbekiston Superligasining hal qiluvchi 30-turidan joy olgan markaziy bahs – “Navbahor” va “Paxtakor” to‘qnashuvi jo‘shqin kurashlar fonida 1:1 hisobida yakunlandi. Uchrashuvning ilk qismida “sherlar” tarkibidagi tajribali hujumchi Igor Sergeev 14-daqiqada darvozaga yo‘l topib, hisobni ochdi va mehmonlarga ustunlik olib keldi.
Ikkinchi bo‘limda namanganliklar pressingni kuchaytirib, tashabbusni qo‘lga oldilar. Bosim natijasida 82-daqiqada Zabihillo O‘rinboyev aniq zarbasi bilan hisobni tenglashtirdi va “Navbahor”ni mag‘lubiyatdan qutqarib qoldi. Uchrashuv jarayonida jiddiy vaziyat ham qayd etildi — 64-daqiqada “Paxtakor” yarim himoyachisi Bashar Rezan hakam qaroriga bo‘ysunishdan bosh tortgani tufayli ikkinchi sariq kartochkani oldi va jamoasini maydonda 10 kishi qoldirdi.
Shu tariqa "Paxtakor" "Navbahor" maydonida ochko yo‘qotganiga qaramay, mavsumni ikkinchi o‘rinda yakunladi.
Shu bilan birga, tur doirasidagi yana bir muhim bellashuv — “Nasaf” va “Dinamo” bahsi ham o‘z nihoyasiga yetdi. Qarshidagi o‘yin intizor bo‘lgan gollarsiz o‘tdi va tomonlar 0:0 hisobida maydonni tark etdi.
Natijada “ajdarlar” mavsumni ishonchli 3-o‘rin bilan yakunladi, Vadim Abramov shogirdlari esa jadvalning 4-pog‘onasidan o‘rin oldilar.
Mavsumning so‘nggi turi kutilganidek dramatik va ta’sirli yakunlandi — muxlislarga munosib tuhfa bo‘lganini aytish mumkin.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
