Enthusiast GeForce RTX 3070 videokartasini 16 GB xotira bilan jihozladi

AssassinWarlord taxallusli texnologiya ishqibozi GeForce RTX 3070 videokartasini 16 GB xotira bilan modernizatsiya qildi. Buning uchun u nosoz AMD Radeon RX 6900 XT videokartasidan olingan Samsung xotira chiplarini Nvidia RTX 3070 platasiga ko‘chirib o‘tkazdi. Bu haqda Ixbt.com xabar beradi.

Faqatgina payvandlash ishlari bilan cheklanib qolmay, tizim 16 GB VRAM hajmini to‘g‘ri aniqlashi uchun platadagi rezistorni almashtirish va VRAM Config (8/16 GB) o‘tkazgichini o‘rnatish talab etildi. Natijada, videokarta hech qanday maxsus drayverlarsiz standart GeForce dasturiy ta’minoti tomonidan to‘liq tan olindi.

Biroq, modifikatsiya qilingan karta ba’zi muammolarga duch keldi: GPU yuqori yuklamadan chiqqanda qora ekran paydo bo‘lishi kuzatildi. Bu muammo BIOS xotira tayminglari bilan bog‘liq bo‘lib, Windows reestrida DisableDynamicPstate parametrini tahrirlash orqali vaqtincha hal etildi.

Ushbu yechimning salbiy tomoni shundaki, videokartaning bo‘sh turgan holatdagi quvvat sarfi 70 Wgacha oshdi. Shunga qaramay, o‘yinlarda unumdorlik sezilarli darajada o‘sdi: Marvel’s Spider-Man 2 o‘yinida 4K Very High sozlamalarida kadrlar soni 20 fpsdan 40+ fpsgacha ko‘tarildi.

Abror Shuhratov

«ZAMIN.UZ» muharriri

+ Zamin.uz saytini Google'ga qo'shing