Okeanlar ulkan maydonni egallagan boʻlsa-da, hozirgi kunda hukumatlar va yuk tashish kompaniyalari uchun suvda nimalar sodir boʻlayotganini aniq kuzatish qiyin boʻlib qolmoqda. Koʻplab zamonaviy kemalar hali ham eskirgan texnologiyalar bilan jihozlangan. Virjiniya shtatida joylashgan Quartermaster startapi ushbu muammoni hal qilish uchun SmartMast deb nomlangan maxsus tizimni ishlab chiqdi. Bu kema machtasiga oʻrnatiladigan, ob-havoga chidamli kameralar va datchiklar toʻplami boʻlib, real vaqt rejimida maʼlumotlarni uzatish imkonini beradi. Bu haqda Techcrunch.com xabar beradi.
Quartermaster asoschisi Neil Sobinʼning soʻzlariga koʻra, SmartMast hozirgi standart hisoblangan AIS (avtomatik identifikatsiya tizimi)dan ancha ilgʻor. AIS tizimi juda sodda va firibgarlikka moyil boʻlib, kontrabandachilar yoki sanksiyalarni chetlab oʻtuvchilar uni osongina oʻchirib qoʻyishi yoki notoʻgʻri maʼlumot kiritishi mumkin. SmartMast esa tahliliy platforma bilan birlashgan holda millionlab kemalar uchun oʻziga xos "umumiy ong" (hive mind) vazifasini oʻtaydi va maʼlumotlarni soxtalashtirishga yoʻl qoʻymaydi.
Ushbu innovatsion loyiha investorlar tomonidan yuqori baholandi va kompaniya yaqinda First Round Capital hamda Quiet Capital boshchiligidagi Series A investitsiya bosqichida 43 million dollar mablagʻ jalb qildi. Investorlarning taʼkidlashicha, Quartermaster okeanlar haqidagi maʼlumotlarni yigʻishda apparat taʼminoti narxi bilan bogʻliq toʻsiqlarni yengib oʻtgan va bu tizimni butun dunyo boʻylab kengaytirish imkoniga ega.
Hozirgi kunda SmartMast bilan jihozlangan 600 dan ortiq kema 10 million kvadrat mildan ortiq okean hududini qamrab olgan. Tizim nafaqat xavfsizlik va logistika, balki ilmiy tadqiqotlar hamda dengizda qutqaruv ishlarida ham qoʻllanilmoqda. Masalan, ushbu texnologiya yordamida hozirgacha 20 dan ortiq dengizchi qutqarib qolingan. Kompaniya maqsadi — barcha dengizchilar uchun foydali va ragʻbatlantiruvchi yagona maʼlumotlar infratuzilmasini yaratishdir.
“Zamin”ni Telegramʻda oʻqing!
