Ўзбекистонда 2026 йилнинг дастлабки уч ойи давомида минглаб аёллар никоҳдан ўтгани маълум қилинди. Миллий статистика қўмитаси тақдим этган рақамлар орасида айниқса 40 ёшдан кейин оила қурган аёллар сони эътибор тортмоқда.
Расмий маълумотларга кўра, январь—март ойларида ФҲДЁ органлари томонидан жами 42,3 мингта никоҳ расман қайд этилган. Никоҳдан ўтган аёлларнинг асосий қисми 20—30 ёш оралиғига тўғри келган бўлиб, ушбу тоифада 22 минг 436 нафар аёл турмуш қурган.
Шунингдек, 20 ёшгача бўлган келинлар сони 14 минг 946 нафарни ташкил этган. 31—40 ёш оралиғида эса 3 минг 687 нафар аёл расман никоҳдан ўтган.
Статистикада энг кўп муҳокама қилинаётган рақамлардан бири — 41 ёш ва ундан катта аёллар билан боғлиқ бўлди. Қайд этилишича, 2026 йилнинг биринчи чорагида 1 минг 232 нафар аёл 40 ёшдан кейин оила қурган.
Маълумот учун, 2025 йил давомида мамлакат бўйича жами 267 минг 131 та никоҳ рўйхатдан ўтказилган. Шулардан 5,3 мингдан ортиқ ҳолат 40 ёшдан кейин турмуш қурган аёлларга тўғри келган.
