Болгария ва Руминия Шенген зонасининг тўлақонли аъзосига айланди

^{Фото: Getty Images}
Болгария ва Руминия Шенген зонасининг тўлақонли аъзолари бўлишди. 1 январ, чоршанба кунидан бошлаб Шенген келишувининг қолган иштирокчилари билан ушбу мамлакатларнинг Европа ички қуруқлик чегараларида текширувлар бекор қилинди.

Европа Иттифоқи ички ишлар вазирлари Австрия ветосини бекор қилганидан кейин деярли уч ҳафта олдин шундай қарор қабул қилган.

Шундай қилиб, Венгрия ёки Греция орқали икки давлатга кирувчи саёҳатчилар ва юк машиналари ҳайдовчилари энди кечикмайди. Ҳужжатлар энди Болгария-Греция чегарасининг олтита расмий ўтиш пунктларида тақдим этилмайди, дея аниқлик киритди dpa агентлиги. Руминия томонидаги чегаранинг 30 километрлик қисмида фақат эълон қилинмаган, тасодифий, мақсадли текширувлар ўтказилади.

Март ойида иккала давлат ҳам келишувга аъзо бошқа давлатлардан киришда аэропортлар ва денгиз портларида назоратдан воз кечган эди.

Шенген зонаси давлатлари сони 29 тага етди

Руминия ва Болгария билан биргаликда Шенген зонасига энди 29 та давлат киради. Гап Европа Иттифоқига аъзо 27 давлатдан 25 таси, шунингдек, Швейцария, Норвегия, Исландия ва Лихтенштейн ҳақида бормоқда.

Бухарест ва София 2007 йилда Европа Иттифоқига қўшилган.

Европа комиссиясига маслаҳат берувчи Европа иқтисодий ижтимоий қўмитаси (EESC) ҳисоб-китобларига кўра, Шенген ҳудудида тўлақонли аъзолик йўқлиги сабабли Болгария ҳар йили 834 миллион евро йўқотган. Руминия учун зарар йилига 2,32 миллиард еврони ташкил этди. Руминиядаги транспорт компаниялари чегаралардаги кечикишлар туфайли йилига яна 90 миллион евро йўқотади.

Ветони бекор қилган Австрия Ички ишлар вазирлиги раҳбари Герхард Карнер ўз позициясининг ўзгаришини «чегарани ноқонуний кесиб ўтишнинг кенг кўламли қисқариши» билан изоҳлади.

Сўнгги ойларда бир қатор Шенген давлатлари, жумладан, Германия ва Нидерландия, ноқонуний миграциянинг кучайиши сабабли ўз чегараларида назоратни жорий қилди. “Замин” янгиликларини “Telegram”да кузатиб боринг