Путин Ғалабанинг 80 йиллиги муносабати билан вақтинчалик сулҳ эълон қилди

Россия Федерацияси президенти Владимир Путин Ғалабанинг 80 йиллиги муносабати билан уч кунлик вақтинчалик сулҳ эълон қилди. Бу ҳақда Кремль хабар берди.

Таъкидланишича, бундай қарор инсонпарварлик нуқтайи назаридан келиб чиқиб қабул қилинган.

“Россия Федерацияси президенти, Россия Федерацияси Қуролли Кучларининг Олий бош қўмондони В. Путин томонидан қабул қилинган қарорга кўра, инсонпарварлик мақсадида Ғалабанинг 80 йиллиги муносабати билан 7 майдан 8 майга ўтар кечаси соат 00:00 дан 10 майдан 11 майга ўтар кечаси соат 00:00 гача Россия томони вақтинчалик тинчлик эълон қилади. Ушбу давр мобайнида барча жанговар ҳаракатлар тўхтатилади”, дейилади хабарда.

Шунингдек, хабарда агар Украина томони тинчликни бузса, Россия ҳарбий кучлари “муносиб ва самарали жавоб” беришини билдириб, шу тариқа Россия Украина инқирозининг асл сабабларини бартараф этишга қаратилган дастлабки шартларсиз тинчлик музокараларига тайёрлигини маълум қилган.

“Россия томони яна бир бор Украина инқирозининг асл сабабларини бартараф этишга қаратилган олдиндан ҳеч қандай шартларсиз тинчлик музокараларини ўтказишга ва халқаро ҳамкорлар билан конструктив алоқалар ўрнатишга тайёр эканлигини билдиради”,- дейилади Кремль баёнотида.

19 апрель куни Путин жанговар тўқнашув чизиғида 30 соатлик Пасха тинчлигини эълон қилган эди. Ўшанда у бу қарор инсонпарварлик нуқтайи назаридан қабул қилинганини таъкидлаганди.

Украина Президенти Владимир Зеленский Пасха тинчлик эълон қилиниши билан дарҳол таклифни рад этганди. Бироқ уч соатдан сўнг, у яна бир баёнот бериб, Украина вақтинчалик тинчлик доирасида жанговар ҳаракатларни тўхтатишга рози эканлигини маълум қилганди.

Россия Мудофаа вазирлиги 21 апрель куни махсус операцияни қайта бошлаганини маълум қилди. Уларнинг маълумотларига кўра, тинчлик даврида Россия тинчлик шартларининг 4900 марта бузилганини қайд этган. Владимир Зеленский эса ўз навбатида Украина Қуролли Кучлари Бош қўмондони Александр Сирскийнинг ҳисоботига таяниб, Россия томонидан 2935 та қоидабузарлик содир этилгани ҳақида хабар берди.

25 апрель куни Россия Федерацияси президенти Владимир Путин АҚШ президентининг махсус вакили Стив Уиткофф билан учрашди. Унда Россия ва Украина ўртасидаги тўғридан-тўғри музокараларни қайта бошлаш имконияти муҳокама қилинди. Бу Уиткоффнинг сўнгги уч ой ичида Россияга тўртинчи ташрифи ва АҚШ президентининг махсус вакили ва Путин ўртасидаги учинчи учрашув ҳисобланади.

11 апрель куни Санкт Петербургда бўлиб ўтган учрашувда Уиткофф ва Путин Украинадаги можарони ҳал қилиш масалаларини муҳокама қилган эди. Ўшанда Россия президенти АҚШдан доимий тинчликни таъминлашни сўраганди. «Замин»ни Telegram’да ўқинг!