Мединский: Россия музокараларга тайёр, Украинадан жавоб кутиляпти

Россия ва Украина ўртасидаги тинчлик музокаралари яна бир бор эътибор марказига чиқди. Россия президентининг ёрдамчиси ва Истанбулдаги музокараларда Россия делегациясига бошчилик қилаётган Владимир Мединский Украина томонига яқин кунларда янги учрашув жойи ва санаси таклиф этилганини маълум қилди.

Унинг бу баёноти Украина президенти Владимир Зеленскийнинг Россияни музокаралар жараёнини чўзишда айблаган чиқишидан сўнг, Telegram орқали эълон қилинди. Зеленскийнинг сўзларига кўра, Украина мудофаа вазири Рустем Умеров Мединскийга қўнғироқ қилган ва ундан Москванинг тез орада отишмани тўхтатиш бўйича позициясини эълон қилишини кутган.

— Лекин биз ҳеч қандай аниқ жавоб олмадик. АҚШ ҳам ҳали жавоб кутяпти. Балки энди кутмасдан, жиддийроқ ҳаракатларга ўтиш вақти келгандир, — деган эди Зеленский.

Бунга жавобан Мединский эса, тескари маълумотларни келтирди. Унга кўра, айнан у Рустем Умеровга қўнғироқ қилган ва жанговар ҳаракатларни тўхтатиш бўйича шартлар кўрсатилган меморандум алмашиш учун аниқ учрашув санаси ва жойини таклиф этган.

— Биз музокараларни айнан шу ернинг ўзида, дарҳол давом эттиришга тайёрмиз. Украина томони маслаҳатлашувга йўл олди. Эҳтимол, мажлис чўзилаётгандир. Биз уларнинг расмий тасдиғини кутяпмиз ва келишилган саналарда шахсан учрашишга тайёрмиз, — деди Мединский.

Эслатиб ўтамиз, Россия ва Украина делегациялари аввалроқ Истанбулда ўтказилган учрашувда отишмани тўхтатиш шартлари бўйича ҳужжатлар тайёр бўлиши билан музокаралар қайта тикланишига келишиб олган эдилар. АҚШ президентининг махсус вакили Кит Келлог эса 26 май куни Украина томони ўз шартлар рўйхатини Вашингтонга тақдим этганини маълум қилган.

Ҳозирча икки томондан ҳам аниқ учрашув санаси эълон қилинмади. Аммо яқин кунларда дипломатик майдонда яна фаол ҳаракатлар кузатилиши мумкин. Ҳар қандай музокара ўзаро ишонч ва аниқ ҳаракатлар асосидагина самара бериши мумкин. Россия томони жавоб кутмоқда, Украина эса ҳаликича таклифларга расмий муносабат билдирмаган.