Трамп: Зарур бўлса, Путин ва Зеленский билан учрашув ўтказишга тайёрман

АҚШ президенти Доналд Трамп Украина ва Россия ўртасидаги узоқ йиллик ҳарбий тўқнашувга нуқта қўйиш мақсадида зарурат туғилса, икки мамлакат раҳбарлари — Владимир Путин ва Володимир Зеленский билан уч томонлама учрашув ўтказишга тайёрлигини маълум қилди. Бу ҳақда у Оқ уйда журналистлар билан суҳбат давомида билдирди.

Журналистлардан бири Трампга "Ҳозир ҳам Путин урушни тугатишни истайди деб ўйлайсизми?" деган саволни берди. Бу саволга жавобан АҚШ президенти Россия билан олиб борилаётган мулоқотларни махсус вакили Стив Уиткофф орқали олиб бораётганини маълум қилди.

— У жуда қаттиқ мулоқот олиб бормоқда. Лекин мен ҳозир бу ҳақда аниқ фикр айта олмайман. Аммо тахминан икки ҳафтадан кейин Путиннинг нима ниятда эканини билиб оламиз. Агар у бизни қандайдир ҳаракатларга ундаётган бўлса, биз ҳам ўз муносабатимизни қайта кўриб чиқамиз, — деди Трамп.

Трамп, шунингдек, яқинда "музокаралар деб аталадиган жараён вақтида одамлар ҳалок бўлгани" уни жуда афсуслантирганини билдирди ва бу каби вазиятларда ҳар қандай тинчлик ташаббуси мураккаблашиши мумкинлигини таъкидлади.

Президентдан Россияга қарши санкциялар нега ҳозиргача жорий этилмаётгани ҳақида ҳам сўралди. Трамп буни эҳтимолий тинчлик келишувини бузмаслик мақсадида шундай қарор қабул қилгани билан изоҳлади.

— Агар зарурат бўлса, мен Путин ва Зеленский билан учрашув ўтказишга ҳам тайёрман, — дея қўшимча қилди у.

Айтиш жоизки, бундан аввалроқ Украина президенти Зеленский ҳам Путин ва Трамп иштирокида уч томонлама учрашув ташкил қилиш таклифини билдирган эди. Бунга жавобан Кремль бу каби учрашувлар фақат икки делегация ўртасида аниқ келишувлар ва самарали натижалар учун майдон яратилган тақдирдагина амалга ошиши мумкинлигини айтган.

Айни пайтда, тинчлик музокаралари масаласи яна сиёсий кун тартибининг энг юқори нуқтасига кўтарилмоқда. Қарши томонлардан ҳар қандай ҳақиқий дипломатик қадамлар миллионлаб инсоннинг тақдирига таъсир кўрсатиши мумкин. Доналд Трампнинг учрашувга тайёр экани эса эҳтимолий тинчлик жараёни учун янги йўл очиши мумкин.