Ўзбекистон Суперлигасининг ҳал қилувчи 30-туридан жой олган марказий баҳс – “Навбаҳор” ва “Пахтакор” тўқнашуви жўшқин курашлар фонида 1:1 ҳисобида якунланди. Учрашувнинг илк қисмида “шерлар” таркибидаги тажрибали ҳужумчи Игор Сергеев 14-дақиқада дарвозага йўл топиб, ҳисобни очди ва меҳмонларга устунлик олиб келди.
Иккинчи бўлимда наманганликлар прессингни кучайтириб, ташаббусни қўлга олдилар. Босим натижасида 82-дақиқада Забиҳилло Ўринбоев аниқ зарбаси билан ҳисобни тенглаштирди ва “Навбаҳор”ни мағлубиятдан қутқариб қолди. Учрашув жараёнида жиддий вазият ҳам қайд этилди — 64-дақиқада “Пахтакор” ярим ҳимоячиси Башар Резан ҳакам қарорига бўйсунишдан бош тортгани туфайли иккинчи сариқ карточкани олди ва жамоасини майдонда 10 киши қолдирди.
Шу тариқа "Пахтакор" "Навбаҳор" майдонида очко йўқотганига қарамай, мавсумни иккинчи ўринда якунлади.
Шу билан бирга, тур доирасидаги яна бир муҳим беллашув — “Насаф” ва “Динамо” баҳси ҳам ўз ниҳоясига етди. Қаршидаги ўйин интизор бўлган голларсиз ўтди ва томонлар 0:0 ҳисобида майдонни тарк этди.
Натижада “аждарлар” мавсумни ишончли 3-ўрин билан якунлади, Вадим Абрамов шогирдлари эса жадвалнинг 4-поғонасидан ўрин олдилар.
Мавсумнинг сўнгги тури кутилганидек драматик ва таъсирли якунланди — мухлисларга муносиб туҳфа бўлганини айтиш мумкин.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
