Соғлиқни сақлаш соҳасида сунъий интеллект (AI) ҳақида гап кетганда, кўпинча ташхис қўйиш ёки дори воситаларини яратиш муҳокама қилинади. Бироқ, тизимнинг энг заиф нуқтаси — бу шифокор ва бемор ўртасидаги маъмурий жараёнлардир. Бирламчи бўғин шифокори йўлланма берганидан сўнг, тор мутахассис қабулига ёзилиш жараёни кўпинча қоғозбозлик ва кечикишлар туфайли самарасиз кечади. Бу ҳақда Techcrunch.com хабар беради.
Басата компанияси асосчилари Калед Алҳанафи ва Четан Пател айнан шу муаммога ечим излашмоқда. Уларнинг шахсий тажрибаси шуни кўрсатдики, ҳатто тиббиёт соҳасидаги мутахассислар ҳам мураккаб бюрократик тўсиқлар туфайли ўз яқинларига тезкор ёрдам кўрсатишда қийналишади. Кўплаб клиникалар ҳали ҳам факс орқали келадиган юзлаб ҳужжатларни қайта ишлашга мажбур, бу эса беморларнинг қабулга туша олмаслигига сабаб бўлади.
Басата тизими факс орқали келган ҳужжатларни автоматик ўқийди, керакли маълумотларни ажратиб олади ва AI овозли ёрдамчиси орқали бемор билан боғланиб, қабул вақтини белгилайди. Тизим электрон тиббий ёзувлар билан интеграция қилинган бўлиб, беморлар ҳатто шифокор хонасидан чиқиб, машинасига етиб боргунига қадар қабулга ёзилишлари мумкин.
Компания ҳозиргача 500 мингга яқин беморнинг йўлланмаларини қайта ишлади ва яқинда 21 миллион долларлик сармоя жалб қилди. Асосчилар бозорни босқичма-босқич эгаллашни режалаштирмоқда: дастлаб кардиология, кейин эса урология йўналишларида хизмат кўрсатишмоқда. Уларнинг мақсади — тиббий хизматни бюрократиядан халос этиб, беморлар учун қулайроқ қилишдир.
“Zamin”ни Telegram'да ўқинг!
