AQSHdagi maktabda 6 yoshli o‘quvchi o‘z o‘qituvchisini otib qo‘ydi

^{Foto: The Virginian-Pilot}
AQSHning Virjiniya shtati Nyuport-Nyus shahrida boshlang‘ich maktabning olti yoshli birinchi sinf o‘quvchisi o‘z o‘qituvchisiga o‘q uzdi, deb yozadi The Virginian-Pilot gazetasi.

Shahar politsiyasi boshlig‘i Stiv Dryu ma’lum qilishicha, o‘quvchi va o‘qituvchi o‘rtasida kelishmovchilik yuzaga kelgan, shundan keyin bolakay unga to‘pponchadan o‘q uzgan. «O‘q tasodifan otilmagan», — deya ta’kidladi politsiyachi.

30 yoshli o‘qituvchi hayot uchun xavfli jarohat olgan va kasalxonaga yotqizilgan. O‘quvchilardan hech biri jabrlanmagan. O‘q uzgan o‘quvchi qo‘lga olingan. Tergovchilar u to‘pponchani qayerdan olganini aniqlashtirmoqda.

Nyuport-Nyus ta’lim departamenti rahbari Jorj Parker III maktabda darslar bekor qilinganini, hukumat «xodimlar va o‘quvchilar ruhiy salomatligi ustida ishlayotgani»ni aytdi. “Zamin” yangiliklarini “Telegram”da kuzatib boring