Tyumen va Sverdlovsk oblastlari bilan oʻzbekistonliklarni ishga joylashtirish boʻyicha kelishib olindi

^{Foto: Dunyo}
Oʻzbekiston Bosh konsulxonasi xodimlari Rossiyaning Tyumen oblastidagi "Siti Stroy72" mas'uliyati cheklangan jamiyati rahbari Janat Gabdulinov va Sverdlovsk oblastidagi "SEVKO" zavodi direktori Vladislav Korotenko bilan muzokara oʻtkazdi.

Uchrashuvlar Oʻzbekiston prezidentining "Xorijda mehnat faoliyatini amalga oshirish jarayonlarini tartibga solish boʻyicha qoʻshimcha chora-tadbirlar toʻgʻrisida"gi qarorida belgilangan vazifalar ijrosi doirasida tashkil etildi.

Muloqotlar davomida Oʻzbekistonda mehnat migratsiyasini tartibga solish boʻyicha amalga oshirilayotgan dasturlar, xorijga ishchi kuchini jalb qilish maqsadida mamlakat har bir viloyatida tashkil etilgan Monomarkazlar faoliyati haqida soʻzlab berildi.

Tomonlar ushbu korxonalarda mavjud boʻsh ish oʻrinlariga Oʻzbekiston fuqarolarini uyushgan holda jalb qilish istiqbollari xususida fikr almashildi.

Boʻlib oʻtgan muzokaralar natijasida "Siti Stroy72" MChJ 100 nafarga yaqin, "SEVKO" zavodi esa 80 kishini ish bilan ta'minlash boʻyicha Oʻzbekiston tomoniga buyurtma joʻnatishi toʻgʻrisida kelishib olindi. “Zamin” yangiliklarini “Telegram”da kuzatib boring