Tramp: Zarur bo‘lsa, Putin va Zelenskiy bilan uchrashuv o‘tkazishga tayyorman

AQSH prezidenti Donald Tramp Ukraina va Rossiya o‘rtasidagi uzoq yillik harbiy to‘qnashuvga nuqta qo‘yish maqsadida zarurat tug‘ilsa, ikki mamlakat rahbarlari — Vladimir Putin va Volodimir Zelenskiy bilan uch tomonlama uchrashuv o‘tkazishga tayyorligini ma’lum qildi. Bu haqda u Oq uyda jurnalistlar bilan suhbat davomida bildirdi.

Jurnalistlardan biri Trampga "Hozir ham Putin urushni tugatishni istaydi deb o‘ylaysizmi?" degan savolni berdi. Bu savolga javoban AQSH prezidenti Rossiya bilan olib borilayotgan muloqotlarni maxsus vakili Stiv Uitkoff orqali olib borayotganini ma’lum qildi.

— U juda qattiq muloqot olib bormoqda. Lekin men hozir bu haqda aniq fikr ayta olmayman. Ammo taxminan ikki haftadan keyin Putinning nima niyatda ekanini bilib olamiz. Agar u bizni qandaydir harakatlarga undayotgan bo‘lsa, biz ham o‘z munosabatimizni qayta ko‘rib chiqamiz, — dedi Tramp.

Tramp, shuningdek, yaqinda "muzokaralar deb ataladigan jarayon vaqtida odamlar halok bo‘lgani" uni juda afsuslantirganini bildirdi va bu kabi vaziyatlarda har qanday tinchlik tashabbusi murakkablashishi mumkinligini ta’kidladi.

Prezidentdan Rossiyaga qarshi sanksiyalar nega hozirgacha joriy etilmayotgani haqida ham so‘raldi. Tramp buni ehtimoliy tinchlik kelishuvini buzmaslik maqsadida shunday qaror qabul qilgani bilan izohladi.

— Agar zarurat bo‘lsa, men Putin va Zelenskiy bilan uchrashuv o‘tkazishga ham tayyorman, — deya qo‘shimcha qildi u.

Aytish joizki, bundan avvalroq Ukraina prezidenti Zelenskiy ham Putin va Tramp ishtirokida uch tomonlama uchrashuv tashkil qilish taklifini bildirgan edi. Bunga javoban Kreml bu kabi uchrashuvlar faqat ikki delegatsiya o‘rtasida aniq kelishuvlar va samarali natijalar uchun maydon yaratilgan taqdirdagina amalga oshishi mumkinligini aytgan.

Ayni paytda, tinchlik muzokaralari masalasi yana siyosiy kun tartibining eng yuqori nuqtasiga ko‘tarilmoqda. Qarshi tomonlardan har qanday haqiqiy diplomatik qadamlar millionlab insonning taqdiriga ta’sir ko‘rsatishi mumkin. Donald Trampning uchrashuvga tayyor ekani esa ehtimoliy tinchlik jarayoni uchun yangi yo‘l ochishi mumkin. “Zamin”ni Telegramʻda oʻqing!