AQSHning Michigan shtatida istiqomat qiluvchi uch yoshli bola Kodi Jeyms Uilyams butun mamlakatda qahramon sifatida tanildi. U onasining hayotini qutqarib qoldi va kattalar ham o‘rnak oladigan jasorat namoyon etdi, deb yozadi The Guardian.
Ma’lumotlarga ko‘ra, voqea ayol og‘ir epileptik tutqanoq xurujiga duchor bo‘lgan paytda sodir bo‘lgan. Onasining ahvolini ko‘rgan kichik Kodi hech ikkilanmasdan harakatga o‘tgan. U avval ham onasining bu kasalligidan aziyat chekkanini ko‘rgani uchun vaziyatda o‘zini yo‘qotmagan.
Bola onasining telefonini olgan, yuziga tutib qulfini ochgan va 911 raqamiga qo‘ng‘iroq qilgan. Bu uch yoshli bola uchun g‘ayrioddiy hol bo‘lsa-da, u vaziyatni to‘g‘ri baholay olgan. Bir necha daqiqa ichida tez yordam xizmati yetib kelib, onasining hayotini saqlab qolgan.
Mahalliy politsiya bo‘limi rahbari Maykl Bushard bu voqeadan keyin maxsus matbuot anjumani o‘tkazgan. U bolani “kichik deputat” deb atab, unga ramziy politsiya nishonini topshirgan. Bushardning ta’kidlashicha, Kodi haqiqiy jasorat va tez fikrlash namunasini ko‘rsatdi.
“Bu voqea har bir ota-ona uchun katta dars bo‘ldi. Farzandlarni favqulodda holatlarda to‘g‘ri harakat qilishga o‘rgatish qanchalik muhim ekanini yana bir bor angladik,” — degan politsiya boshlig‘i.
Hozirda Kodi va uning onasi o‘zini yaxshi his qilmoqda. Qo‘shnilar va mahalliy jamoa ularni tabriklab, bolaga “qahramon bola” deb nom bergan. Kodi esa hozircha o‘z qilgan ishining naqadar katta ahamiyatga ega ekanini to‘liq anglamayotgan bo‘lsa-da, uning jasorati butun mamlakat bo‘ylab yuraklarni ilitdi.
“Zamin”ni Telegramʻda oʻqing!
