Prezident Shavkat Mirziyoyev Samarqand viloyatiga amaliy tashrif bilan kelib, hududda yirik investitsiya va qurilish loyihalarini ishga tushirish marosimida faol ishtirok etdi.
Ushbu marosim doirasida davlat rahbari ramziy tugmani bosib, Samarqanddagi mavjud loyihalarni faollashtirish va yangi loyihalar qurilishini rasman boshladi. Bu loyihalar Avstriya, Xitoy, Birlashgan Arab Amirliklari, Turkiya, Hindiston va Rossiya bilan hamkorlikda amalga oshiriladi va umumiy qiymati 2 milliard 400 million dollar bo‘lgan 53 ta yirik loyiha ishga tushirildi.
Shu bilan birga, Niderlandiya, Yaponiya, Janubiy Koreya, Xitoy, Birlashgan Arab Amirliklari, Turkiya, Rossiya va Eron bilan hamkorlikda 4 milliard 600 million dollar qiymatdagi 53 ta loyihaning qurilish ishlari boshlandi.
Mazkur loyihalarning amalga oshirilishi natijasida 18 mingdan ortiq yangi ish o‘rinlari yaratilishi, 13 trillion so‘mlik sanoat mahsulotlari ishlab chiqarilishi va 700 million dollarlik eksport salohiyati ta’minlanishi ko‘zda tutilmoqda. Bu esa viloyat sanoatini diversifikatsiya qilish, zamonaviy ishlab chiqarish zanjirlarini kengaytirish va eksport geografiyasini yanada rivojlantirish imkonini beradi.
Tadbir davomida hududda oziq-ovqat, yengil sanoat, kimyo va farmatsevtika, qurilish materiallari, metall va mebel sanoati sohalarida ishlab chiqarilayotgan mahsulotlar ko‘rgazmasi tashkil etildi. Prezident hududning zamonaviy ishlab chiqarish quvvatlari, ilg‘or texnologiya va texnikalar hamda sanoat mahsulotlari bilan yaqindan tanishdi.
Bu tashabbuslar Samarqand iqtisodiyotini yuqori texnologiyali va eksportga qaratilgan hududga aylantirishda muhim qadam sifatida baholanmoqda.
“Zamin”ni Telegramʻda oʻqing!
