Timur Kapadze Qozogʻistonda futbolni rivojlantirish boʻyicha qanday maslahat berdi?

Qozogʻistonning sportga ixtisoslashgan saytlaridan biri “Spors.kz” Oʻzbekiston Olimpiya terma jamoasi sobiq bosh murabbiyi Timur Kapadze bilan bogʻlanib, Oʻzbekiston futbolidagi rivojlanishning asosiy nuqtalari, Abduqodir Husanovning “Manchester Siti”ga oʻtishi va Qozogʻiston futbolini yaxshilash boʻyicha suhbatlashdi. Quyida ushbu intervyuda berilgan savollarga Temur Kapadzening javoblari bilan tanishishingiz mumkin.

— Soʻnggi paytlarda Oʻzbekiston futboli katta e'tiborni jalb qilmoqda. Sizningcha, yuksalishning asosiy sababi nimada?
— Eng avvalo, mamlakatimizda futbolni juda sevishadi.

— Futbolingiz rivojlanishida qaysi lahza hal qiluvchi boʻldi?
— 2019 yil oxirida Oʻzbekiston Prezidentining mamlakatda futbolni rivojlantirish boʻyicha farmoni imzolandi. Ushbu farmonda 2030 yilgacha futbolni yangi bosqichga olib chiqish kontseptsiyasi tasdiqlandi. Oʻylaymanki, bu bizning futbolimiz rivojlanishidagi asosiy nuqta boʻldi.

— Mantiqan olganda, Oʻzbekistonning keyingi yutugʻi Jahon chempionatiga chiqish boʻlishi kerak. Bu boradagi imkoniyatlaringizni qanday baholaysiz?
— Ha, biz terma jamoamizning Jahon chempionatiga chiqishiga ishonamiz, chunki imkoniyatlarimiz yaxshi. Guruhdagi holat ham, terma jamoamizning potentsiali ham raqiblarni magʻlub etib, Jahon chempionatiga yoʻl olishga etadi.

— Hozir koʻpchilik Abduqodir Husanovning “Manchester Siti”ga oʻtishi haqida gapirmoqda. Bu siz uchun kutilmagan hol boʻldimi?
— Husanovning “Man Siti”ga oʻtishi hamma uchun kutilmagan voqea boʻldi, chunki klub dunyoning eng kuchli jamoalaridan biri boʻlib, uni eng yaxshi murabbiylardan biri boshqaradi. Rostini aytsam, biz futbolchimiz uchun juda xursandmiz va faxrlanamiz. Bunday nufuzli klub va murabbiy Husanovning potentsialini yuqori baholab, uni taklif qilgani biz uchun katta sharaf.

— Qozogʻiston terma jamoasi oʻyinlarini kuzatib borasizmi?
— Albatta, kuzataman, ular uchun qaygʻuraman va muxlislik qilaman!

— Oʻtgan yil Qozogʻiston milliy terma jamoasi uchun muvaffaqiyatsiz boʻldi. Sizningcha, vaziyatni yaxshilash uchun nima qilish kerak?
— Haqiqatni aytadigan boʻlsam, toʻgʻri baho berish uchun vaziyatni ichkaridan tushunish kerak. Umuman olganda, bolalar futbolini rivojlantirish, ommaviylikni oshirish, sharoitlarni yaxshilash va murabbiylarning malakasini oshirish zarur. Bu koʻp vaqt talab qiladi, lekin boshqa yoʻl yoʻq. Futbolni rivojlantirish kontseptsiyasini ishlab chiqish kerak, terma jamoa murabbiylari uchun esa koʻp sonli kuchli mahalliy futbolchilar kerak, shunda raqobat va tanlov boʻladi. Oʻshandagina terma jamoa kuchli boʻladi.

— Siz Qozogʻiston chempionatida uzoq vaqt oʻynagansiz. Qozogʻiston va Oʻzbekiston futboliga munosabatda qanday farqlarni koʻrdingiz?
— Qozogʻiston va Oʻzbekistonda futbolni yaxshi koʻrishlariga shubham yoʻq. Lekin bizda futbolni rivojlantirish uchun koʻp ishlar qilinmoqda – infratuzilma, sport maktablari, stadionlar, maydonlar, bazalar yaratilmoqda.

— Legionerlar limitiga koʻp e'tirozlar boʻlmoqda, hozir bizda deyarli cheklov yoʻq. Bu masalada fikringiz qanday?
— Menimcha, hamma narsa me'yorida boʻlishi va Qozogʻiston futbolini rivojlantirishga xizmat qilishi kerak.

— Qozogʻiston klublaridan takliflar boʻlganmi?
— Ha, Qozogʻiston klublaridan qiziqish boʻlgan, lekin men terma jamoada ishlayotganim sababli band edim”, dedi Oʻzbekiston Olimpiya jamoasining sobiq bosh murabbiyi.

Ma'lumot uchun, Timur Kapadze Qozogʻistonning “Aqtobe” safida uch mavsum muvaffaqiyatli oʻynab, shu davr mobaynida Qozogʻiston chempionligi va superkubogini qoʻlga kiritgan.

Oʻzbekiston Kapadze boshchiligida tarixda ilk bor Olimpiya yoʻllanmasini qoʻlga kiritdi. Fransiyada oʻtkazilgan musobaqada jamoa bitta durang va ikki magʻlubiyatni qayd etib guruhda qolib ketdi.

2024 yil yakuniga koʻra, Kapadze Oʻzbekistonda yilning eng yaxshi murabbiyi sifatida e'tirof etildi. “Zamin” yangiliklarini “Telegram”da kuzatib boring