«Real Madrid» bosh murabbiyi Xabi Alonso jamoaning yetakchi futbolchilaridan biri — Vinisius Junior bilan munosabatlariga oid fikrlari bilan o‘rtoqlashdi. Uning ta’kidlashicha, braziliyalik hujumchi bilan orasidagi o‘zaro ishonch va ochiq muloqot jamoa o‘yinida muhim omillardan biri hisoblanadi.
«Vinisius bilan munosabatlarimiz juda puxta. U jamoa o‘yinida hal qiluvchi o‘rin tutadi. Oramizda o‘zaro ishonch mavjud. Har bir bellashuvdan oldin u mening fikrlarimni bilib oladi, men esa uning nima o‘ylayotganini. Qarorlarni birgalikda qabul qilishning eng to‘g‘ri yo‘li shu», — dedi Alonso TNT Sports Brasil bilan suhbatda.
O‘tgan turda «Real» Chempionlar Ligasi umumiy bosqichining 5-turida «Olimpiakos»ni 4:3 hisobida mag‘lub etdi. Bellashuvda Mbappening pokeri barcha muhokamaning markazida bo‘ldi, ammo Vinisius Junior ham o‘z hissasini qo‘shmay qolmadi — u fransuz yulduzining ikki goliga aniq pas bilan yordam berdi.
Bellashuvdan so‘ng maydondagi iliq manzara muxlislarni yanada xursand qildi — Alonso va Vinisius bir-birini samimiy tabriklab, besh tashlab, quchoqlashib qo‘yishdi. Bu holat jamoadagi atmosfera qay darajada kuchli ekanini yana bir bor namoyon etdi.
Madridliklar hozirgi paytda yuqori ruhiyatda bo‘lib, murabbiy va yetakchilar o‘rtasidagi bunday ishonchli aloqalar «qaymoqranglilar»ning keyingi bosqichlardagi harakatiga katta ta’sir ko‘rsatishi shubhasiz.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
