UFC olamida navbatdagi qiziq ziddiyat yuzaga keldi. Irlandiyalik jangchi Ian Garri amaldagi chempion Islom Maxachevning oktagonga qaytish borasidagi ishorali postiga keskin va hazilomuz tarzda javob qaytardi.
Garri ijtimoiy tarmoqda yozgan bayonotida Maxachevning qaytish sanasi borasidagi noaniqliklarga eʼtibor qaratdi. “Avvaliga qoʻling jarohat olganini aytding. Sen iyulda qaytishingni aytyapsan, Dana Uayt esa avgustni tilga olmoqda. Biroq bu orada biz charchab ketdik. Hammamiz seni kutyapmiz, malika”, — deya yozdi irlandiyalik jangchi.
Bu soʻzlar UFC muxlislari orasida katta muhokamalarga sabab boʻldi. Ayrimlar buni oddiy provokatsiya deb baholasa, boshqalar ehtimoliy jang oldidan psixologik bosim sifatida qabul qilmoqda.
Eslatib oʻtamiz, Ian Garri soʻnggi jangini 22 noyabr kuni Qatarda boʻlib oʻtgan turnirda oʻtkazgan edi. U ushbu bahsda tajribali raqib, sobiq chempion Belal Muhammadni hakamlarning yakdil qarori bilan magʻlub etib, oʻz pozitsiyalarini yanada mustahkamladi.
Ayni paytda Islom Maxachevning qachon ringga qaytishi borasida aniq maʼlumot yoʻq. Biroq uning har bir bayonoti va ijtimoiy tarmoqdagi harakatlari katta qiziqish bilan kuzatilmoqda.
Qisqacha aytganda, UFC sahnasida katta janglar oldidan ruhiy oʻyinlar boshlangan. Endi esa muxlislar Maxachevning javobini va uning haqiqiy qaytish sanasini intiqlik bilan kutmoqda.
“Zamin”ni Telegramʻda oʻqing!
