Alphonso Daviesning jarohati sababli Jahon chempionatida ishtirok etishi yoki etmasligi borasidagi bahslar davom etmoqda. Bavariya klubi rahbariyati Kanada futbol assotsiatsiyasi bilan yuzaga kelgan tushunmovchiliklarning oldini olish maqsadida vaziyatni toʻliq oʻz nazoratiga olishga qaror qildi. Bu haqda Goal.com xabar beradi.
Klub shifokorlarining xulosasiga koʻra, chap qanot himoyachisi son mushaklaridagi jiddiy jarohat tufayli taxminan olti hafta maydonga tusha olmaydi. Bu muddat futbolchining turnirda qatnashish imkoniyatini deyarli yoʻqqa chiqaradi, biroq Kanada terma jamoasi shifokorlari tiklanish jarayoni ancha tezroq kechishiga ishonch bildirmoqda.
Bavariya sport direktori Max Eberl klub vaziyatni diplomatik yoʻl bilan hal qilishga urinayotganini taʼkidladi. Uning soʻzlariga koʻra, Daviesning turnirda ishtirok etishi uchun barcha tomonlar hamkorlik qiladi, ammo asosiy shart — futbolchining toʻliq sogʻayishi hisoblanadi.
Klubning bu boradagi qatʼiy pozitsiyasi bejiz emas. 2025-yilning mart oyida Davies xochsimon bogʻlamlaridan jarohat olganida, Bavariya Kanada futbol assotsiatsiyasini futbolchini jarohat bilan oʻynatib, uning sogʻligʻini xavf ostiga qoʻyganlikda ayblab, keskin tanqid qilgan edi.
“Zamin”ni Telegramʻda oʻqing!
