Amerikaning Epirus va General Dynamics Land Systems (GDLS) kompaniyalari zamonaviy urushlarda tobora kuchayib borayotgan dron tahdidlariga qarshi kurashda yangi bosqichni boshladi. Ular mikrotо‘lqinli qurol va sun’iy intellektga ega yerusti texnikasini birlashtirgan yangi avtonom robot tizimini taqdim etishdi.
Leonidas Autonomous Robotic (Leonidas AR) deb nomlangan bu platforma Epirus’ning yuqori quvvatli mikrotо‘lqinli quroli — Leonidas tizimini GDLS ishlab chiqqan 10 tonnali Tracked Robot (TRX) shassisiga o‘rnatadi. Natijada, butun dronlar to‘dasini bir zarbada yo‘q qila oladigan, mobil va to‘liq avtonom aksildron tizimi yaratildi.
Leonidas tizimi asosan kuchli mikrotо‘lqinli impulslar orqali dushman dronlarining elektronikasini ishdan chiqaradi. Ya’ni, u raketa yoki artilleriyasiz, faqat elektromagnit kuch yordamida dronlarni bir zumda faoliyatsiz holga keltiradi. Bu jarayon “bir impuls – ko‘p nishon” prinsipi asosida ishlaydi.
Aniqligi va tezkorligi bilan ajralib turuvchi tizim operatorga turli sharoitlarda chastota va quvvatni moslashtirish imkonini beradi. Shuningdek, “xavfsiz hudud” funksiyasi yordamida o‘z dronlariga zarar yetkazmaslikni ta’minlaydi. Tizimni yangilash uchun maydonni tark etish ham shart emas — barcha modifikatsiyalar masofadan turib o‘rnatiladi.
Bu platforma GDLS ishlab chiqqan TRX kuzatuvchi robot bazasida qurilgan. 10 tonna og‘irlikdagi gibrid-elektr transport vositasi sun’iy intellekt va kuchli sensorlar bilan jihozlangan. U bir marta quvvatlanishda 480 km masofani bosib o‘tadi va soatiga 72 km tezlikka erisha oladi. Radar va hisoblash tizimlari tufayli u ham avtonom, ham masofadan boshqariladigan holatda ishlashi mumkin.
Mutaxassislar fikricha, Leonidas AR — zamonaviy harbiy texnologiyalar rivojida yangi bosqich bo‘lib, u nafaqat dron tahdidlariga qarshi samarali yechim, balki kelajakda butun armiyalar uchun avtomatlashtirilgan mudofaa tizimiga aylanishi mumkin.
“Zamin”ni Telegramʻda oʻqing!
