Roomba robot-changyutgichlari yaratuvchisi Colin Angle oʻzining yangi Familiar Machines & Magic startapi doirasida uy hayvoni vazifasini oʻtay oladigan sunʼiy intellektli robotni ishlab chiqmoqda. Familiar deb nomlangan ushbu toʻrt oyoqli qurilma ayiq, boyqush va oltin retrver koʻrinishlarini oʻzida mujassam etgan boʻlib, u foydalanuvchi bilan hissiy bogʻliqlik oʻrnatishga moʻljallangan. Bu haqda Ixbt.com xabar beradi.
Qurilma Nvidia Jetson Orin chipi bazasida ishlaydi va generativ model yordamida internetga ulanmasdan, mahalliy darajada maʼlumotlarni qayta ishlaydi. Robot oʻzining harakatlari, mimikasi va tovushlari orqali muloqot qiladi, bu esa uni oddiy ekranli gadjetlardan ajratib turadi. Colin Angle robotning vazifasi shunchaki buyruqlarni bajarish emas, balki oila aʼzolari bilan birga yashab, ularning odatlariga moslashadigan «raqamli mavjudot» yaratish ekanligini taʼkidlaydi.
Familiar loyihasi Disney, MIT, Boston Dynamics va Amazon kabi yetakchi kompaniyalardan kelgan mutaxassislar tomonidan ishlab chiqilmoqda. Robotning asosiy maqsadi — yolgʻizlik bilan kurashish, bolalar va qariyalarga hamrohlik qilish hamda odamlarni ekranlardan chalgʻitib, faolroq hayot tarziga undashdir. Uning narxi uy hayvonini boqish xarajatlariga teng boʻlishi kutilmoqda.
Ishlab chiquvchilar robotning inson qiyofasida boʻlishidan ataylab voz kechishgan, chunki bu foydalanuvchilarda ortiqcha kutishlarni keltirib chiqarishi mumkin. 2026-yilda bozorga chiqishi kutilayotgan ushbu robot zinadan chiqish yoki buyumlarni ushlash kabi murakkab mexanik vazifalarni bajarmaydi, buning oʻrniga u xavfsizlik va hissiy muloqotga koʻproq eʼtibor qaratadi.
“Zamin”ni Telegramʻda oʻqing!
