Mitsubishi Motors insonsimon robotlar ishlab chiqarishni boshlaydi

Yaponiyaning taniqli avtomobilsozlik kompaniyasi Mitsubishi Motors kelajak texnologiyalari sari muhim qadam tashlab, insonsimon robotlar ishlab chiqarishga kirishishini eʼlon qildi. ixbt.com maʼlumotiga koʻra, mazkur yoʻnalishdagi ommaviy ishlab chiqarish jarayoni 2027 yil boshidayoq boshlanishi rejalashtirilgan boʻlib, bu qadam sanoat tarmoqlarida yangi davrni boshlab berishi kutilmoqda. Bu haqda Ixbt.com xabar beradi.

Yangi loyihani amalga oshirish uchun Kioto shahridagi zavod tanlangan. Korxonadagi hozirda foydalanilmayotgan dvigatellar ishlab chiqarish liniyasi toʻliq qayta jihozlanib, robototexnika talablariga moslashtirilmoqda. Ushbu tashabbus avtomobilsozlik gigantining ishlab chiqarish quvvatlarini zamonaviy talablar asosida diversifikatsiya qilish strategiyasining bir qismidir.

Loyihaning texnik hamkori va quvvatlari

Mazkur ulkan loyihada Mitsubishi kompaniyasining asosiy hamkori sifatida Tokiyodagi Highlanders startapi tanlandi. 2023 yilda Tokio universiteti bitiruvchilari tomonidan asos solingan ushbu yosh kompaniya oʻzining ilgʻor ishlanmalari bilan eʼtiborni tortgan. Avvalroq Mitsubishi mazkur startapga sarmoya kiritgan boʻlib, kelgusida ham moliyalashtirishni davom ettirishini tasdiqlagan.

Korxona oʻzining loyihaviy quvvatiga chiqqandan soʻng, zavod oyiga 1000 tagacha insonsimon robot ishlab chiqarish imkoniyatiga ega boʻladi. Dastlabki bosqichda yaratilayotgan gumanoidlar toʻgʻridan-toʻgʻri Mitsubishi korxonalarining oʻzida ishga tushiriladi va turli murakkab ishlab chiqarish operatsiyalarini bajaradi.

HL Human gumanoidi va sunʼiy intellekt imkoniyatlari

Ishlab chiqarish jarayonining asosiy poydevori sifatida 2025 yilda omma eʼtiboriga havola etilgan HL Human gumanoidi tanlangan. Ushbu robot harakatlanish erkinligini taʼminlovchi 19 ta darajaga ega korpus hamda tabiiy harakatlarni kafolatlovchi elektr yuritmalari bilan jihozlangan. Mashinaning atrof-muhitni idrok etishi, harakatlarni rejalashtirishi va ovozli buyruqlarni bajarishi uchun sunʼiy intellekt tizimi masʼuldir.

Kelgusgi avlod robotlariga besh barmoqli toʻlaqonli qisqich-qoʻllarni oʻrnatish rejalashtirilgan. Bu esa manipulyatorlarga 3 kilogrammgacha boʻlgan ogʻirlikdagi narsalarni ushlab turish imkonini berib, ishlab chiqarish liniyalaridagi funksional imkoniyatlarni sezilarli darajada kengaytiradi.

Kelajakdagi maqsadlar va keng qoʻllanish doirasi

Amaliy foydalanish jarayonida yigʻilgan barcha maʼlumotlar sunʼiy intellekt algoritmlarini takomillashtirish, mashinalarning ishonchliligini oshirish hamda ularni tijorat maqsadlarida keng qoʻllash uchun puxta zamin hozirlaydi. Kelgusida kompaniyalar ushbu robotlarni kadrlar taqchilligidan aziyat chekayotgan boshqa sanoat korxonalariga ham taklif qilishni niyat qilgan.

Robotlarning oʻzidan tashqari, ishlab chiqaruvchilar mashinalar xatti-harakatlarini oʻqitish va modellashtirishga moʻljallangan maxsus dasturiy platformani ham yaratmoqda. Mazkur tizim robotlarni nafaqat zavodlarda, balki logistika, infratuzilmani nazorat qilish hamda qutqaruv operatsiyalarida ham tezkorlik bilan moslashtirish imkonini berishi koʻzda tutilgan.