Ўзбекистонда туғилиш кўрсаткичлари барқарор сақланиб қолаётган бир пайтда, яна бир қизиқ тенденция кузатилмоқда — кеч она бўлиш ҳолатлари тобора кўпаймоқда. Статистика агентлиги маълумотларига кўра, 2026 йилнинг дастлабки уч ойида мамлакатда жами 191 086 нафар чақалоқ дунёга келган.
Эътиборли жиҳати шундаки, ушбу даврда 40 ёшдан ошган 3,4 мингдан ортиқ аёл илк бор ёки навбатдаги марта она бўлган. Айрим ҳолатларда эса 50 ёшга яқин бўлган аёллар ҳам соғлом фарзандли бўлаётгани қайд этилмоқда.
Мутахассислар бу ҳолатни, аввало, тиббиёт соҳасидаги ютуқлар билан изоҳламоқда. Замонавий диагностика, репродуктив саломатликка оид хизматлар ва тиббий назоратнинг яхшиланиши туфайли аёллар анча катта ёшда ҳам соғлом фарзанд кўриш имкониятига эга бўлмоқда.
Шунингдек, ижтимоий омиллар ҳам муҳим аҳамиятга эга. Кўплаб аёллар аввал таълим олиш, касбий фаолиятни йўлга қўйиш ёки молиявий барқарорликка эришишни мақсад қилиб, она бўлишни кейинги даврга қолдирмоқда.
Шифокорлар таъкидлашича, кеч она бўлиш имконияти ошганига қарамай, бундай ҳолатда соғлиқни доимий назорат қилиш, тиббий текширувлардан ўтиб туриш ва мутахассис тавсияларига амал қилиш жуда муҳим ҳисобланади.
Ижтимоий тармоқларда эса бу тенденция кенг муҳокама қилинмоқда. Айримлар буни замон талаби сифатида баҳоласа, бошқалар она бўлиш учун энг мақбул ёш масаласида турли фикрларни билдирмоқда.
“Zamin”ни Telegram'да ўқинг!
