16:57 / 01.03.2025

Зеленский Трампдан кейин Франция президенти ва НАТО бош котиби билан гаплашди

^{Фото: Sarsenov Daniiar/Ukraine Presidency/Planet Pix/ZUMAPRESS/picture alli}
Франция президенти Эммануэл Макрон 28 феврал, жума куни кечқурун украиналик ҳамкасби Володимир Зеленский АҚШ президенти Доналд Трамп томонидан можароли тарзда қабул қилинганидан сўнг унга қўнғироқ қилди. Бу ҳақда Financial Times журналисти Кристофер Миллер Украина етакчиси атрофидаги манбаларига таяниб хабар берди.

Зеленский ва Макрон телефонда айнан нимани муҳокама қилгани номаълум. Бироқ FT'нинг қўшимча қилишича, уларнинг суҳбатидан сўнг Украина президенти НАТО бош котиби Марк Рюттега ҳам қўнғироқ қилган. Бу суҳбатнинг мазмуни ҳам ҳозирча номаълум.

Бир кун аввал Рютте Шимолий Атлантика алянси Украинага янги ёрдам пакети, жумладан «миллиардлаб евро» ва хавфсизлик кафолатлари учун бадаллар тайёрлаётганини эълон қилди. НАТО бош котиби бу ҳақда Трамп билан телефон суҳбатидан сўнг баёнот берди, Рюттенинг ўзи буни «аъло» деб баҳолади.

Украина ва АҚШ президентларининг учрашуви жанжал билан якунланди

Володимир Зеленский ва Доналд Трамп 28 феврал куни Вашингтондаги Оқ уйда учрашди. Икки етакчи АҚШ ва Украина ўртасида фойдали қазилмалар бўйича келишув имзолаши кутилган эди. Бироқ учрашув қизғин оҳангда ўтди: Зеленский Трамп ва АҚШ вице-президенти Жей Ди Вэнс билан баҳслашишга мажбур бўлди ва Оқ уйни эрта тарк этди. Бироқ шартнома имзоланмади.

Учрашув давомида Трамп Зеленскийни бир неча бор ношукурликда айблади. «Сиз Учинчи жаҳон уруши келтириб чиқаришингиз мумкин. Ва қилаётган ишларингиз сизни кўпчиликдан кўра кўпроқ қўллаб-қувватлаган давлатга нисбатан чуқур ҳурматсизликдир», — деди АҚШ президенти ва агар келишувга эришилмаса, Украина бўйича музокаралардан чиқиш билан таҳдид қилди.

Учрашувдан сўнг Зеленский Америкага кўрсатган ёрдами учун миннатдорчилик билдирди ва «Украинага адолатли ва мустаҳкам тинчлик керак ва биз айнан шу мақсадда ҳаракат қиляпмиз», деб эслатди.

Кўплаб европалик сиёсатчилар, жумладан Эммануэл Макрон Трамп билан бўлган жанжалдан кейин Украина раҳбарини қўллаб-қувватлади. «Агрессор — Россия. Агрессия қурбони эса Украина. Биз ёрдам берганларга раҳмат айтишимиз керак, лекин бошиданоқ курашганларни ҳурмат қилишимиз керак», — деди Франция президенти.