Германия канцлери Фридрих Мерцнинг таъкидлашича, Украина президенти Володимир Зеленский ва Россия раҳбари Владимир Путин ўртасидаги эҳтимолий тўғридан тўғри музокаралар Швейцариянинг Женева шаҳрида ўтиши мумкин.
2 сентябр, сешанба куни Берлинда Швейцария президенти Карин Келлер-Зуттер билан биргаликда ўтказилган қўшма матбуот анжуманида Мерц бу борада ўз фикрларини очиқ билдирди. Унга кўра, Женева ўт очишни тўхтатиш ҳамда тинчлик келишувига эришиш учун энг муносиб майдон ҳисобланади.
Германия ҳукумати раҳбари шунингдек, 4 сентябр куни Парижда гибрид форматда ўтказилиши режалаштирилган Украина бўйича «кўнгиллилар коалицияси» йиғилиши давомида ана шу таклифни янада очиқ шаклда билдиришини маълум қилди. Ундан олдинроқ Франция президенти Эммануэл Макрон ҳам Путин ва Зеленский ўртасидаги учрашув Женевада бўлиши тарафдори эканини эслатиб ўтганди.
Швейцария президенти Карин Келлер-Зуттер эса ўз нутқида ҳукумати Женева шаҳрида бундай учрашувни ташкил этишга ҳар томонлама тайёрлигини таъкидлади. Унга кўра, халқаро ташкилотларнинг кўплаб марказий идоралари айнан шу ерда жойлашгани учун Женева тинчлик музокаралари учун «идеал нуқта» ҳисобланади.
«Энг муҳими — тарафлар бир-бирини эшитишга ва камида олдинга қадам қўйишга тайёр бўлишлари. Урушни тўхтатиш учун уларнинг бевосита мулоқотга киришиши зарур. Аммо, албатта, бунинг амалга ошиши барча томонларнинг музокара столига ўтиришга розилигига боғлиқ бўлади», — деди Швейцария раҳбари ўз чиқишида.
Женевада бундай юқори даражадаги саммитнинг ташкил этилиши Украина–Россия урушини тўхтатиш йўлида янги саҳифа очиши мумкинлиги таъкидланмоқда.
«Замин»ни Telegram’да ўқинг!
