Украина президенти Володимир Зеленский АҚШ ва Россия президентлари Доналд Трамп ҳамда Владимир Путин ўртасида Будапештда бўлиб ўтиши кутилган учрашувга қўшилишга тайёр эканини маълум қилди, деб ёзди NBC News.
Журналистнинг “Сиз саммитда қатнашишга тайёрмисиз?” деган саволига Зеленский шундай жавоб берди:
«Мен тайёрман. Бу ҳақда АҚШ президентига Оқ уйдаги учрашувимиз пайтида ҳам айтганман. Мен ҳар қандай форматда иштирок этишга тайёрман».
Унинг таъкидлашича, Украинасиз ҳеч қандай ҳақиқий тинчлик келишуви амалга ошиши мумкин эмас.
«Адолатли ва барқарор тинчлик учун ҳар икки томон зарур. Бизсиз қандай келишув бўлиши мумкин?» — деди Зеленский.
Президентга Россия билан урушни тўхтатиш учун Украина ҳудудининг бир қисмидан воз кечиш мумкинми, деган савол ҳам берилди. Зеленскийнинг жавоби қатъий бўлди:
«Агар урушни зудлик билан тўхтатмоқчи бўлсак, биз турган жойда қолишимиз керак. Путинга ҳеч қандай ортиқча имтиёз ёки ҳудуд берилмайди».
Украина раҳбари суҳбат давомида фронтдаги вазият ҳақида ҳам тўхталиб ўтди. Унинг сўзларига кўра, Украина урушни ютқазмаяпти, аммо Россия ҳам ғалаба қозона олмаяпти. Шу боис Москва сўнгги ҳафталарда тинч аҳолига қарши ҳаво ҳужумларини кучайтирган.
«Путин қиш мавсумида Украинада энергия инқирозини юзага келтиришни истаяпти. Шунинг учун у ҳаво ҳужумларини кучайтирмоқда», — деди Зеленский.
Оқ уй матбуот котиби Кэролайн Левиттнинг маълум қилишича, Вашингтон Зеленскийнинг Будапештда бўлиб ўтадиган учрашувда иштирок этишини қўллаб-қувватлайди.
17 октябрь куни Трамп Вашингтонда Зеленский билан учрашув ўтказди. АҚШ президентининг айтишича, Украина раҳбари саммитга келмаслиги мумкин, аммо улар “доимий алоқада бўлиб туришади”.
Шундай қилиб, Киев ва Вашингтон ўртасида дипломатик фаоллик янада кучаймоқда — Зеленскийнинг тинчлик музокараларига тайёрлиги можарони сиёсий йўл билан ҳал этиш йўлида муҳим қадам сифатида баҳоланмоқда.
“Zamin”ни Telegram'да ўқинг!
