Ўзбекистон миллий терма жамоаси сардори ва энг зўр тўпурари Элдор Шомуродов 2020 йилнинг октябрида Россия Премьер-лигасидан Италия А Сериясига кўчиб ўтганидан бери ҳар трансфер ойнаси очилиши билан легионеримиз воқеалар марказида бўлади.
Бу гал ҳам худди шу ҳолат такрорланмоқда. Аслида “Рома”га тегишли бўлган 29 ёшли ҳужумчи якунланган мавсумни “Кальяри”да ўтказди. Сардинияликлар ўзбек легионерини тўлиқ трансфер қилиш учун пойтахтликлар сўраган маблағ – 9 миллион еврони топиб бера олмади.
30 июнь куни Элдорнинг ижара шартномаси тугаб, ҳамюртимиз яна расман “Рома” футболчиси мақомига қайтди.
Италия ва Россия футболини яхши биладиган мутахассис Игорь Коливанов ўзбекистонлик чарм тўп устасининг “Рома”даги вазияти бўйича ўз фикр-мулоҳазаларини билдирди.
- Элдор “Рома”нинг янги бош мураббийи Даниэле Де Россига керак бўлиб қолиши эҳтимоли ва имкони бор. Чунки бу мутахассис ҳали Шомуродов билан шахсан таниш эмас.
Ҳа, клубда рақобат жиддий, жамоа ўз олдига катта мақсадларни қўймоқда, лекин Даниэле Де Росси ўйинчига бошқача назар билан қарайди, унга имкон бериши мумкин.
Олдинда ўқув-машғулот йиғинлари бор. Футболчи ўзини кўрсата олиши, жамоага ёрдами тегишини намойиш қилиши керак.
Агар мураббий шунда ҳам ўйинчини таркибга киритмаса, у ҳолда бошқа жамоага кетган маъқул, чунки захирада пайт пойлаб ўтирмасдан, ўйин амалиётига эга бўлиш муҳим аҳамият касб этади.
Шомуродовга ҳам ҳар қандай футболчига бўлгани каби унга ишонч билдиришлари муҳим, учта ўйин бир захирадан майдонга туширилиши, ўнта ўйинда бир бор бошланғич таркибга киритилиши – ҳам руҳий ҳам жисмоний томондан жуда оғир ҳолат ҳисобланади, - деди Игорь Коливанов.
Россиялик мутахассиснинг таъкидлашича, Шомуродов А Сериянинг ўртамиёна жамоалари ва ҳатто бошқа хорижий клубларда ҳам асосий таркибнинг муқим ўйинчиси бўлишга қодир.
- Қарорни футболчининг ўзи қабул қилиши керак. Чунки асосий масала “Рома” пул ишлаб олишни истаётганига бориб тақалади. Шу боис, ҳозирча, Элдор Шомуродов жуда мураккаб вазиятда, - деди Игорь Коливанов.
Эслатиб ўтамиз, Игорь Коливанов фаолиятининг беш йилини Москванинг “Динамо” клубида ўтказганидан кейин Италияга йўл олган. Машҳур ҳужумчи ўн йил давомида “Фоджа” ва “Болонья” клублари шарафини ҳимоя қилган.
Элдор Шомуродов А Серияда “Женоа”, “Рома”, “Специя” ва “Кальяри” жамоаларида тўп тепди.
Легионеримиз Италия чемпионатига кўчиб ўтганидан бери ҳозиргача жами 102 маротаба майдонга тушиб, ўз ҳисобига 15 та гол ёздириб қўйган ва жамоадошларига 9 та голли пас узатган. Бугунги кунда Элдор Шомуродовнинг трансфер нархи 5 миллион еврога баҳоланмоқда. «Замин» янгиликларини «Вконтакти»да кузатиб боринг
Ctrl
Enter
Хато топдИнгизми?
Иборани ажратиб Ctrl+Enter тугмасини босингМавзуга оид янгиликлар
Маданият вазири Озодбек Назарбеков кийим дўкони тавсия қилинган роликда кўриниш берди
Туркия президенти икки вазирини ўзгартирди
Санэпидқўмита: “One Chip Challenge” чипсининг хавфсизлиги текширилмаган
Юнусободда сув қувуридаги авария сабаб айрим кўчаларда транспорт ҳаракати чекланди
Россияда сўнгги 130 йил ичидаги ҳарорат рекордлари янгиланмоқда
Болалардан ўрганишимиз керак бўлган самарадорликни оширишнинг 5 усули
БМТ “Толибон” ҳукуматини тан олиш масаласини рад этди
Солиқда «тозалаш»: 3 та вилоят ва 4 та туманда мансабдор солиқчилар ишдан олинди
