Ўзбекистон терма жамоасининг собиқ бош мураббийи Темур Кападзе ҳозирда Индонезияда бўлиб турибди. Унинг ташрифи атрофида турли миш-мишлар тарқалгани боис мутахассис бугун ўтказилган кичик матбуот анжуманида вазиятга ойдинлик киритди.
Кападзенинг таъкидлашича, мазкур сафар тўғридан-тўғри футбол билан боғлиқ эмас. У Индонезияга маҳаллий туризм соҳасида фаолият юритаётган йирик компания таклифи асосида ташриф буюрган.
«Бу ерга келишимнинг асосий сабаби — туризмга оид бир компаниянинг таклифи. Индонезия терма жамоаси билан боғлиқ расмий суҳбат ёки интервью ўтказиш режам ҳозирча йўқ. Шу билан бирга, менга келаётган барча таклифларни кўриб чиқаман. Мен ҳар қандай конструктив таклифга очиқман», — деди мураббий.
Шу билан бирга, Кападзе ПССИ — Индонезия футбол федерацияси билан маълум даражада мулоқот бўлганини ҳам тасдиқлади. Аммо унинг қайд этишича, бу суҳбат расмий таклиф сифатида қабул қилиниши мумкин эмас.
«Ҳа, федерация билан алоқа бўлган. Мен Сумаржи билан қисқа суҳбат ўтказганман, лекин бу расмий таклиф эмас эди. Саволлар асосан умумий мазмунда берилди, масалан: “Индонезияда ишлашга хоҳишингиз борми?”. Мен эса бу мамлакатга келмоқчи эканимни айтдим ва ташрифдан кейин масала устида ўйлаб кўриш мумкинлигини таъкидладим. Баъзи саволлар умумий тарзда, масалан: “Индонезия билан ҳамкорлик қилиш истагингиз борми?” каби эди. Мен шу саволларга мос равишда жавоб бердим», — дея қўшимча қилди мутахассис.
Кападзенинг бу изоҳлари Индонезиядаги футбол жамоатчилиги орасида пайдо бўлган “янги бош мураббий” ҳақидаги миш-мишларга маълум даражада аниқлик киритди. Аммо мураббийнинг ўзи келгуси режалар очиқ қолганини тан олмоқда — демак, келажакда яна янги бой имкониятлар юзага чиқиши мумкин.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
