Ўзбекистон миллий терма жамоасининг собиқ бош мураббийи Темур Кападзе Индонезия сафари чоғида “Гаруда ТВ”га катта интервью берди. Суҳбат давомида у 2024 йилги Осиё ўйинлари ярим финалидаги Ўзбекистон U-23 — Индонезия U-23 тўқнашувини яна бир бор ёдга олди ва ўша кечанинг ортидаги сирлар билан ўртоқлашди.
Кападзенинг айтишича, ўша баҳс нафақат тактик жиҳатдан, балки жамоа учун уч йил давомида амалга оширилган меҳнатнинг энг муҳим “синови” бўлган.
“Бу ўйин 3 йиллик меҳнатимизга баҳо эди”
«Индонезияга қарши ўша учрашув биз учун бутун цикл давомида эришган ишларимизни намоён этган финал синови эди. Чунки айнан шу ўйинда ғалабага эришиб, Олимпиада йўлланмасига эга чиққанмиз. Жуда катта босим, кескин кайфият ва асабий вазият бўлган.
Стадионнинг 80 фоизи индонезиялик мухлислар билан тўлган эди, улар ҳақиқий 12-ўйинчи каби жамоасини олға етаклади. Аммо биз охирги дақиқагача таслим бўлмадик ва мақсадга ета олдик. Бу оддий баҳс эмас — каръерамдаги энг таъсирли учрашувлардан бири бўлган. Индонезия жуда мослашувчан ва қаттиқ қаршилик кўрсатди», — деди Кападзе.
Ўша куннинг натижаси
Ушбу ўта масъулиятли ярим финалда Ўзбекистон U-23 термаси 2:0 ҳисобида зафар қучган ва натижада Париж Олимпиадасига йўлланмани қўлга киритган.
Кападзе таъкидлаганидек, бу ўйин нафақат натижа, балки жамоанинг руҳи, иродаси ва характерини намоён қилган тарихий баҳс сифатида хотираларда қолган.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
