AQSh deportatsiya qilingan migrantlarni Salvadordagi qamoqxonaga joʻnatmoqchi

^{Foto: Bloomberg}
Salvador hukumati Qoʻshma Shtatlar tomonidan deportatsiya qilingan muhojirlarni, shuningdek, zoʻravonlik jinoyatlari uchun hukm qilingan odamlarni qabul qilishga va ularni mahalliy qamoqxonaga joylashtirishga rozi boʻldi. Bu haqda Deutsche Welle xabar berdi.

AQSh davlat kotibi Marko Rubio va Salvador prezidenti Nayib Bukele 3 fevral kuni boʻlib oʻtgan uchrashuvda shunday kelishuvga erishdi.

“Hozirda butun mintaqadagi vaziyatni beqarorlashtirayotgan ommaviy noqonuniy migratsiya toʻlqinlariga qarshi kurashishga qaratilgan koʻplab kelishuvlar tuzildi”, deyiladi Vashingtondagi tashqi siyosat idorasi bayonotida.

Ushbu ma'lumotlarga koʻra, Bukele Salvadorning MS-13 jinoiy guruhi va Venesuelaning Tren de Aragua guruhining barcha a'zolarini qabul qilishga rozi boʻlgan.

“Hech bir mamlakat hech qachon qilmagan favqulodda ishora sifatida prezident Bukele oʻz qamoqxonalariga xavfli amerikalik jinoyatchilarni, jumladan, AQSh fuqarolari va qonuniy rezidentlarini joylashtirishni taklif qildi”, deya ta'kidladi Davlat departamenti.

Salvador AQShdan kelgan jinoyatchilarni mega qamoqxonaga joylashtiradi

Oʻz navbatida, Salvador prezidenti ma'lum bir toʻlov evaziga AQShdan kelgan jinoyatchilar Salvador Cecot qamoqxonasiga joylashtirilishini aytdi.

“Narxlar AQSh uchun nisbatan past, ammo biz uchun sezilarli boʻladi”, dedi Bukele.

40 minggacha mahbus saqlanishi mumkin boʻlgan gigant Cecot qamoqxonasi ikki yil oldin Salvadorda uyushgan jinoyatchilikka qarshi kurash doirasida ochilgandi. Shundan soʻng mamlakatda qotilliklar soni sezilarli darajada kamaygan.

AQSh Davlat kotibi Marko Rubio lavozimga kirishganidan keyin birinchi ishchi safarini amalga oshirmoqda. Safar doirasida u Panama va Salvadorga tashrif buyurgan. Shundan soʻng uni Gvatemala, Kosta-Rika va Dominikan Respublikasiga borishi kutilmoqda. Ushbu mamlakatlar rahbariyati bilan muzokaralarda AQSh prezidenti Donald Tramp e'lon qilgan noqonuniy muhojirlarni ommaviy deportatsiya qilish masalasi markaziy oʻrin tutadi. “Zamin” yangiliklarini “Telegram”da kuzatib boring