Rossiya va Ukraina o‘rtasidagi muhim muzokaralar sanasi o‘zgartirildi

Istanbulda bo‘lib o‘tishi kutilgan Rossiya va Ukraina o‘rtasidagi muhim tinchlik muzokaralari, avval belgilangan sanadan bir kunga kechiktirilib, juma, 16 may kuniga ko‘chirildi. Bu haqda Rossiyaning TASS axborot agentligi xabar tarqatdi.

Muzokaralarning dastlabki rejasiga ko‘ra, ikki mamlakat delegatsiyalari 15 may kuni Istanbul shahridagi tarixiy Dolmabahche saroyida uchrashishi kerak edi. Ukraina delegatsiyasi mazkur kun tarkibidagi yuqori darajali vakillari bilan Turkiyaga yetib kelgan bo‘lsa-da, Rossiya tomoni uchrashuvni bir kunga kechiktirishni taklif etdi.

Eslatib o‘tamiz, Rossiya prezidenti Vladimir Putin Yevropa Ittifoqi va AQSHning 30 kunlik o‘t ochishni to‘xtatish bo‘yicha chaqiriqlariga javoban, 15 may kuni Istanbulda to‘g‘ridan to‘g‘ri tinchlik muzokaralarini o‘tkazish tashabbusini ilgari surgan edi. Ukraina rahbari Volodimir Zelenskiy bu taklifni qo‘llab-quvvatlab, Putin bilan Turkiyada shaxsan uchrashuvga tayyor ekanini bildirgan bo‘lsa-da, Rossiya tomoni Putinning shaxsan ishtirokini tasdiqlamadi va o‘z delegatsiyasini Vladimir Medinskiy boshchiligida yuborayotganini ma’lum qildi.

Ukraina prezidenti Zelenskiy o‘z bayonotida, Rossiyaning yuqori darajadagi vakillari o‘rniga ikkinchi darajali vakillarni yuborayotganini tanqid qilib, bu vaziyatning Moskva tomonidan muzokaralarga jiddiy yondashuv yo‘qligini ko‘rsatayotganini ta’kidladi. Lekin shu bilan birga, Ukraina tomoni AQSH prezidenti Donald Trampga nisbatan hurmat yuzasidan ushbu uchrashuvga jiddiy ahamiyat berib, yuqori martabali vakillarni yuboradigan bo‘ldi.

Ukraina delegatsiyasining tarkibi quyidagi yuqori lavozimli shaxslardan iborat bo‘ladi:

• Mudofaa vaziri – Rustem Umerov (delegatsiya rahbari);
  
• Tashqi ishlar vazirining birinchi o‘rinbosari – Sergey Kislitsa;
  
• Ukraina Xavfsizlik xizmati raisi o‘rinbosari – Aleksandr Poklad;
  
• Tashqi razvedka xizmati birinchi o‘rinbosari – Oleg Lugovskiy;
  
• Ukraina Qurolli kuchlari Bosh shtabi boshlig‘ining o‘rinbosari – Aleksey Shevchenko;
  
• Razvedka bosh boshqarmasi boshlig‘i o‘rinbosari – Vadim Skibitskiy;
  
• Havo kuchlari qo‘mondonligi shtab boshlig‘i o‘rinbosari – Yevgeniy Shinkarev;
  
• Harbiy-dengiz kuchlari qo‘mondonligi shtab boshlig‘i o‘rinbosari – Aleksandr Dyakov;
  
• Qurolli kuchlar Bosh shtabi Markaziy yuridik boshqarmasi xalqaro huquq bo‘limi boshlig‘i – Aleksey Malovatskiy;
  
• Qurolli kuchlar Bosh operativ boshqarmasining katta ofitseri – Aleksandr Sherixov;
  
• Ukraina Qurolli kuchlari bosh qo‘mondoni apparati protokol bo‘limi ofitseri – Georgiy Kuzmichev;
  
• Ukraina prezidenti ofisi rahbarining maslahatchisi – Aleksandr Bevz.
  

Tinchlik muzokaralarining 16 may kuniga ko‘chirilishi xalqaro hamjamiyat e’tiborini yanada kuchaytirdi. Istanbulda bo‘lib o‘tadigan mazkur tarixiy uchrashuvdagi natijalar ikki davlat o‘rtasidagi munosabatlar kelajagiga muhim ta’sir o‘tkazishi mumkin.

Zamin.uz tahririyati ushbu muhim siyosiy uchrashuv bilan bog‘liq eng so‘nggi xabarlarni sizga o‘z vaqtida yetkazishda davom etadi. Biz bilan qoling! “Zamin”ni Telegramʻda oʻqing!