Yaqin Sharqda yana bir bor keskinlik oshib bormoqda. 17-iyun kuni Eron Tashqi ishlar vazirligi tomonidan e’lon qilingan rasmiy bayonotda aytilishicha, Isroil harbiy kuchlari tomonidan Tehron shahrining shimoliy hududlariga amalga oshirilgan havo hujumi oqibatida kamida 17 nafar fuqaro hayotdan ko‘z yumdi.
Rasmiy ma’lumotlarga ko‘ra, raketalar shahardagi tibbiy muassasa yaqinidagi yo‘lga tushgan bo‘lib, aynan o‘sha paytda ko‘chada harakatlanayotgan avtomobillar va yo‘lovchilar to‘g‘ridan to‘g‘ri zarbaga uchragan. Halok bo‘lganlar orasida homilador ayol, voyaga yetmagan yosh bola va uch yoshli go‘dak ham borligi ma’lum qilindi.
Eron TIV bayonotida, shuningdek, hujum natijasida suv quvuri portlashi oqibatida yuzaga kelgan toshqin haqida ham ma’lumot berilgan. Ayni falokatda bir nechta uy va infratuzilmalar zarar ko‘rgan. Suv toshqinida bir bola cho‘kib ketgani aytilmoqda.
Raqamlar bo‘yicha, ushbu hujumda yana 46 nafar fuqaro tan jarohati olgan, ulardan ba'zilari og‘ir ahvolda kasalxonalarga yetkazilgan.
Isroil tomoni ushbu hujumga oid rasmiy bayonot bermagan, biroq mintaqadagi vaziyat tobora chigal tus olib bormoqda. Harbiy harakatlar tinch aholini nishonga olayotgani haqidagi da’volar esa xalqaro hamjamiyatda keskin norozilik uyg‘otmoqda.
Mutaxassislar bu kabi zarbalar mintaqada nafaqat siyosiy, balki gumanitar inqirozni ham kuchaytirishini ta’kidlashmoqda. Shu sababli, xalqaro tashkilotlar zudlik bilan vaziyatga aralashib, tinchlik yo‘lida muzokaralarga chaqirishi zarur bo‘lmoqda. “Zamin”ni Telegramʻda oʻqing!
Ctrl
Enter
Xato topdIngizmi
Iborani ajratib Ctrl+Enter tugmasini bosing Mavzuga oid yangiliklar
