Tramp va Si Chzinpin savdo tariflarini pasaytirishga kelishdi

AQSh Prezidenti Donald Tramp va Xitoy Raisi Si Chzinpin Janubiy Koreyada bo‘lib o‘tgan Osiyo-Tinch okeani iqtisodiy hamkorligi (APEC) sammiti doirasida uchrashuv o‘tkazdi. 1 soat 40 daqiqa davom etgan muzokaralar natijasi AQSh-Xitoy munosabatlari va global savdoga sezilarli ta’sir ko‘rsatishi mumkin bo‘lgan bir qator bayonotlar bilan yakunlandi.

Muzokaralar konstruktiv va ishchan ruhda o‘tib, ikkala tomon vakillari ishtirokida bo‘lib o‘tdi. Xitoy delegatsiyasini Si Chzinpindan tashqari Tashqi ishlar vaziri Van I, Prezident ma’muriyati rahbari Tsay Si, Davlat rejalashtirish qo‘mitasi raisi Chjen Shanzyets va Savdo vaziri Van Ventao boshqardi.

AQSh tomonidan esa Davlat kotibi Marko Rubio, Moliya vaziri Skott Bessent, Oq uy boshqaruvi rahbari Syuzan Uayls va AQShning Xitoydagi elchisi Devid Perdyu qatnashdi. Donald Tramp Janubiy Koreyani tark etar ekan, Air Force One samolyotida jurnalistlar bilan suhbatlashdi.

U uchrashuvni "ajoyib" deb atadi va uni "10 ballik tizimda 12 ball" deb baholadi. Muzokaralarning asosiy natijasi savdo to‘siqlarining o‘zaro pasaytirilishi bo‘ldi.

Trampning so‘zlariga ko‘ra, o‘rtacha tariflar 57 foizdan 47 foizga tushiriladi. Amaliy qadam sifatida Xitoy AQShdan soya loviyasi sotib olishni zudlik bilan tiklashi ma’lum qilindi, bu AQSh fermerlari uchun muhim ahamiyatga ega.

Bundan tashqari, fentanil ishlab chiqarish va tarqatishni nazorat qilish bilan bog‘liq bojxona to‘lovlari ikki barobarga kamayib, 10 foizga tushirilishi belgilandi. Ushbu qadam noqonuniy opioid savdosiga qarshi kurashda hamkorlikni rag‘batlantirishga qaratilgan.

Yana bir muhim kelishuv noyob yer elementlarini eksport qilish masalasini hal qilish bo‘ldi. AQSh Prezidenti bu masalaning "to‘liq hal etilganini" tasdiqladi va Xitoy ushbu strategik materiallarni yetkazib berishni davom ettiradi.

Uchrashuvda xalqaro xavfsizlik masalalari ham muhokama qilindi. Tramp AQSh va Xitoyning Ukrainadagi vaziyatni hal qilish bo‘yicha hamkorlikni boshlashini e’lon qildi, bu esa mojaroni bartaraf etishga qaratilgan diplomatik sa’y-harakatlar uchun yangi yo‘nalish bo‘lishi mumkin.

Qiziqarli jihati shundaki, muzokaralar davomida Tayvan masalasi tilga olinmagan. Muzokaralar oliy darajadagi diplomatik muloqotlarni faollashtirish rejasi bilan yakunlandi.

Donald Tramp kelasi yilning aprel oyida Xitoyga tashrif buyurishini, Si Chzinpin esa yaqin orada AQShga javob tashrifi bilan kelishini ma’lum qildi. “Zamin”ni Telegramʻda oʻqing!