Noto‘g‘ri ulangan gaz: 3 kishining umriga zomin bo‘ldi
Joriy yil 2 dekabr kuni Guliston shahri Taraqqiyot mahallasida faoliyat yuritgan Bek Family Cafe umumiy ovqatlanish shoxobchasida suyultirilgan gazballoni portlashi oqibatida yuz bergan mudhish hodisadan so‘ng, korxona mas’ul shaxslariga nisbatan jinoyat ishi ochildi va ular hibsga olindi.
Tergovga qadar to‘plangan dastlabki ma’lumotlarga ko‘ra, fojia oshxonadagi o‘choqqa yong‘in xavfsizligi qoidalariga zid ravishda ulangan 50 litr hajmdagi propan gazballonidan uglevodorod gazining sizib chiqishi natijasida havo bilan aralashma hosil bo‘lishi va uning chaqnashi oqibatida dahshatli portlash yuzaga kelgan.
Qurbonlar va davom etayotgan davolash
Ushbu portlash oqibatida jami 29 nafar fuqaro har xil darajadagi kuyish jarohatlari olib, shoshilinch tibbiy yordam markaziga yetkazilgan. Afsuski, olingan og‘ir tan jarohatlari tufayli 3 nafar fuqaro vafot etgan.
Jabrlanuvchilardan 5 nafariga zarur tibbiy yordam ko‘rsatilib, ahvoli qoniqarli deb topilgach, uyiga javob berildi. Qolgan bemorlarga statsionar sharoitida malakali tibbiy xizmat ko‘rsatish davom ettirilmoqda.
3 nafar rahbar hibsda, tergov nazoratda
Mazkur holat yuzasidan O‘zbekiston Respublikasi Jinoyat kodeksining bir necha moddalari bilan jinoyat ishi ochilgan. Xususan, Bek Family Cafe MCHJning 3 nafar mansabdor shaxsi protsessual tartibda qamoqqa olingan.
Holat yuzasidan Jinoyat kodeksining bir nechta og‘ir moddalari:
– 192¹¹-modda (xavfsizlik qoidalarini buzish),
– 257-modda 2-qismi “a, b”,
– 259-modda 2-qismi “a, b” bo‘yicha jinoyat ishi qo‘zg‘atildi.
Hozirda Ichki ishlar vazirining o‘rinbosari – IIV huzuridagi Tergov departamenti boshlig‘i Ramazon Ashropov boshchiligida hamkor idoralar mutaxassislaridan iborat tergov guruhi tomonidan barcha zarur tergov harakatlari amalga oshirilmoqda. Tergov jarayoni qat’iy nazoratga olingan bo‘lib, uning yakuni bo‘yicha jamoatchilikka qo‘shimcha ma’lumot berilishi rejalashtirilgan.
Bu hodisa yana bir bor xavfsizlik qoidalariga befarqlik qanday og‘ir oqibatlarga olib kelishi mumkinligini eslatdi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
