Davlat xavfsizlik xizmati va Ichki ishlar organlari hamkorligida o‘tkazilgan tezkor amaliyot davomida Yuqori Chirchiq tumanida shubhali "Spark" avtomashinasi to‘xtatildi. Mashina ichida bo‘lgan 1993-1995-yillarda tug‘ilgan uch nafar poytaxtlik shaxsning yonidan "Tropikamid" va "Pregabalin" kabi kuchli ta’sir etuvchi dori vositalari topildi.
"Zakladchik"lardan laboratoriyagacha bo‘lgan yo‘l
Tergov harakatlari davomida ushbu shaxslar internetdagi narkodo‘konga xizmat qilishi aniqlandi. Ko‘p o‘tmay, Toshkent shahrining turli nuqtalarida "zakladka" (yashirin joylarga og‘-u qo‘yish) bilan shug‘ullanuvchi yana ikki nafar yosh yigit qo‘lga olindi. Ular yashirgan xufiya joylardan 1300 dan ortiq kuchli ta’sir etuvchi dorilar ashyoviy dalil sifatida olib qo‘yildi.
Eng qiziqarli tafsilotlar Sergeli tumanida yuzaga chiqdi. Aniqlanishicha, barcha og‘ular aynan shu yerdagi yashirin laboratoriyada tayyorlangan.
Sergelidagi "zahar ishlab chiqarish" zavodi
Tezkor guruh mazkur xonadonni ko‘zdan kechirganda, 4 nafar shaxs dori vositalarini qo‘lbola usulda tayyorlayotgan ustida qo‘lga tushdi. U yerdan:
- 10 kg "Pregabalin" va 6 kg "Tropikamid" xomashyosi;
- 5130 dona tayyor kapsula;
- 60 ming dona bo‘sh idish va flakonlar hamda maxsus jihozlar musodara qilindi.
Hozirda ushbu guruh a’zolariga nisbatan Jinoyat kodeksining 251¹-moddasi bilan jinoyat ishi qo‘zg‘atilib, ular qamoqqa olingan.
Qirg‘iziston orqali kelgan 34 ming dollarlik og‘-u
DXX va Bojxona idoralarining navbatdagi tadbiri Shayxontohur tumanida bo‘lib o‘tdi. 1987-yilda tug‘ilgan fuqaroning uyi va mashinasidan jami 24 223 dona kuchli ta’sir etuvchi dori vositalari ("Regapen", "Lirika", "Perge") topildi.
Ma’lum bo‘lishicha, bu shaxs kontrabanda yo‘li bilan Qirg‘izistondan Farg‘onaga, so‘ngra Toshkentga keltirilgan dorilarni 34 000 AQSH dollariga sotib olgan. Uning maqsadi — poytaxtda ularni qayta sotib, mo‘may daromad topish bo‘lgan. Hozirda uning Farg‘onadagi sheriklarini aniqlash bo‘yicha qidiruv ishlari davom etmoqda.
Sizningcha, mahallalarda bunday yashirin laboratoriyalar va "zakladchik"larga qarshi kurashishda jamoatchilik nazoratini qanday kuchaytirish kerak?
“Zamin”ni Telegramʻda oʻqing!
