O'zbekiston temir yo'l sohasida harakat tarkibini keng ko'lamda modernizatsiya qilish rejalashtirilmoqda. Bu tashabbuslar Prezident farmoni loyihasida nazarda tutilgan bo'lib, u “Mahalla rivoji va jamiyat farovonligini yuksaltirish yili” doirasidagi ustuvor islohotlar dasturi hamda “O'zbekiston – 2030” strategiyasiga bog'langan. Bu haqda uzdaily.uz xabar beradi.
“O'zbekiston temir yo'llari” yuk tashish yo'nalishidagi vagon parkini yangilash uchun 1 mingta yangi yuk vagonini ishlab chiqarishni, yo'lovchi tashish tizimini modernizatsiya qilish maqsadida esa 50 ta yo'lovchi vagonini tayyorlashni ko'zlamoqda.
Lokomotivlar parkini yangilash doirasida 25 ta dizel va 25 ta gibrid manyovr lokomotivini xarid qilish rejalashtirilgan.
Texnik yangilanish bilan birga, yangi yo'lovchi marshrutlarini yo'lga qo'yish ham ko'zda tutilgan. Jumladan, Toshkent — Xiva yo'nalishida yuqori tezlikdagi elektrooyezdni ishga tushirish, shuningdek Toshkent — Bekobod yo'nalishida zamonaviy elektrooyezd qatnovini tashkil etish rejalari bor.
Ushbu chora-tadbirlar temir yo'llarning o'tkazuvchanlik imkoniyatini oshirish, yo'lovchilar uchun safar vaqtini qisqartirish va yuk tashish samaradorligini kuchaytirish orqali mamlakat iqtisodiyoti ehtiyojlarini yanada yaxshiroq qondirishga qaratilgan.
“Zamin”ni Telegramʻda oʻqing!
