Endilikda mehnat migratsiyasida bo‘lgan O‘zbekiston fuqarosi xorijda vafot etgan taqdirda, uning jasadini Vatanga olib kelish bilan bog‘liq xarajatlar davlat hisobidan qoplanadi.
Bu tartib “Dafn etish va dafn ishi to‘g‘risida”gi qonunga kiritilgan yangi qo‘shimchalar orqali mustahkamlandi.
Yangi normaga muvofiq, mehnat faoliyati davrida chet elda vafot etgan yurtdoshlarimizning jasadini olib kelishni tashkil etish xarajatlari Migratsiya jamg‘armasi mablag‘lari hisobidan moliyalashtiriladi. Mazkur mablag‘lar Vazirlar Mahkamasi huzuridagi Migratsiya agentligi tomonidan amaldagi qonunchilik talablari asosida ajratiladi.
Ma’lum qilinishicha, ushbu qonun Qonunchilik palatasi tomonidan 2025 yil 1 iyul kuni qabul qilingan bo‘lib, Senat tomonidan 2025 yil 4 sentyabrda ma’qullangan. Shuningdek, hujjat bilan bir qator normativ-huquqiy hujjatlarga o‘zaro muvofiqlashtirishga qaratilgan o‘zgartirish va qo‘shimchalar ham kiritilgan.
Qayd etilishicha, mazkur o‘zgarishlar fuqarolarning huquq va qonuniy manfaatlarini himoya qilishga, shu bilan birga mehnat migratsiyasida yurgan yurtdoshlarimizning oila a’zolarini ortiqcha moliyaviy xarajatlardan asrashga xizmat qiladi. Bundan tashqari, marhumning jasadini Vatanga qaytarish jarayonini davlat tomonidan moliyaviy qo‘llab-quvvatlash mexanizmi aniq belgilab berildi.
“Zamin”ni Telegramʻda oʻqing!
