Milliy statistika qo‘mitasi keltirgan ma’lumotlarga ko‘ra, 2025 yil davomida mamlakatda tibbiy xizmatlar narx-navolarida sezilarli ko‘tarilish kuzatildi. Ayrim yo‘nalishlarda qimmatlashuv 10 foiz “psixologik chegara”sidan ham oshib ketgani aholining kundalik xarajatlariga bevosita ta’sir qilmasdan qolmadi.
Yil yakunlari bo‘yicha e’lon qilingan raqamlar shundan dalolat beradiki, tibbiyotning deyarli barcha asosiy xizmat turlarida narxlar yuqoriga siljigan:
– stomatologiya xizmatlari o‘rtacha 5,1 foizga qimmatladi;
– tibbiy laboratoriya xizmatlari 10,3 foizga oshdi;
– ambulatoriyada davolanish xizmatlari 9,4 foizga ko‘tarildi;
– diagnostika vizualizatsiyasi (UZI, MRT, KT kabi) xizmatlari 9,1 foizga o‘sdi;
– statsionar davolash hamda reabilitatsiya xizmatlari esa 7,5 foizga yuqoriladi.
Ko‘rinib turibdiki, eng katta o‘sish aynan laboratoriya xizmatlari hisobiga to‘g‘ri kelgan. Bu esa tahlillar, tekshiruvlar va turli testlar narxi yil davomida eng tez “yugurgan” yo‘nalish bo‘lganini anglatadi. Shu bilan birga, ambulator davolanish va diagnostika xizmatlaridagi qimmatlashuv ham kam emas — bu toifalar aholi eng ko‘p murojaat qiladigan xizmatlardan sanaladi.
Mutaxassislar fikricha, tibbiy xizmatlar narxining o‘zgarishi bir nechta omillar ta’sirida shakllanishi mumkin. Xususan, inflyatsiya jarayonlari, xizmat ko‘rsatish xarajatlarining ortishi, sarf materiallari qimmatlashi, shuningdek, zamonaviy uskunalardan foydalanish va ularga xizmat ko‘rsatish bilan bog‘liq chiqimlar narxlarga bosim o‘tkazishi ehtimoldan holi emas.
Qisqasi, 2025 yil tibbiy xizmatlar bozorida “narxlar joyida turmaydi” degan tendensiyani yana bir bor ko‘rsatdi. Endi esa aholi uchun eng muhim savol — 2026 yilda ham bu ko‘tarilish davom etadimi yoki vaziyat biroz barqarorlashadimi?
“Zamin”ni Telegramʻda oʻqing!
