Manchester Yunayted klubidan ijaraga olingan Marcus Rashford xalqaro jamoadoshi Anthony Gordon jamoaga kelganiga qaramay, Barselona tarkibida qolishni oʻzining asosiy maqsadi deb bilmoqda. 29 yoshli hujumchi Ispaniya chempionlari uni sotib olish bandini faollashtirishga ikkilanayotgan boʻlsa-da, bosh murabbiy Hansi Flick bergan vaʼdalarga tayanmoqda. Bu haqda Goal.com xabar beradi.
Rashford oʻzining Instagram sahifasida mashgʻulotlardan suratlar joylab, "Keep it moving" (Harakatda davom et) deya izoh qoldirdi. Bu bilan u tashqi OAVdagi shov-shuvlarga eʼtibor bermasligini va bor diqqatini futbolga qaratishini namoyish etdi. Gordonning transferi koʻpchilikda Rashfordning Kataloniyadagi kelajagi borasida shubha uygʻotgan edi.
Mundo Deportivo nashrining xabar berishicha, ingliz vingeri Old Traffordga qaytishdan koʻra faoliyatini Ispaniyada davom ettirishni afzal koʻrmoqda. Hansi Flick futbolchining taktik harakatlaridan mamnunligini va uni kelasi mavsumda ham jamoada koʻrmoqchi ekanligini shaxsan maʼlum qilgan.
Hozirda asosiy toʻsiq iqtisodiy masalalar bilan bogʻliq boʻlib turibdi. Barselona va Manchester Yunayted oʻrtasidagi ijara shartnomasida 30 million yevrolik sotib olish bandi mavjud. Biroq, bu kelashuv amalga oshishi uchun klub La Liga moliyaviy qoidalariga muvofiq maoshlar fondida joy boʻshatishi lozim.
Rashfordning vakillari futbolchi Anthony Gordon uchun toʻlangan 80 million yevrolik transferdan xavotirda emasligini taʼkidlamoqda. Hujumchi boshqa Yevropa klublaridan tushayotgan takliflarni muzlatib qoʻyishni va faqat Barselona bilan muzokaralarga eʼtibor qaratishni buyurgan.
“Zamin”ni Telegramʻda oʻqing!
