Magnit labirinti: Sunʼiy intellekt yapon fiziklariga motorlar qizish sirlarini ochishda yordam berdi
Elektromobillar bozorining shiddatli oʻsishi elektr dvigatellarining energiya samaradorligini oshirish zaruriyatini yuzaga keltirdi. Bu boradagi asosiy texnik muammolardan biri — magnit gisterezisi yoki temirdagi energiya yoʻqotishlaridir. Dvigatel ichidagi magnit maydonlari yuqori chastotada yoʻnalishini oʻzgartirganda, elektr energiyasining bir qismi issiqlikka aylanib, motor oʻzagini qizdiradi. Bu jarayon materiallarning magnitsizlanishiga va foydali ish koeffitsientining pasayishiga olib keladi. Bu haqda Ixbt.com xabar beradi.
Tokio fan universiteti olimlari Sukuba, Okayama va Kioto universitetlari bilan hamkorlikda ushbu muammoni hal qilish uchun eX-GL deb nomlangan yangi nazariy modelni ishlab chiqdilar. Tadqiqotda magnit domenlarining — material ichidagi mikroskopik sohalarning murakkab "labirint" tuzilishi oʻrganildi. Bunday tuzilmalar harorat oʻzgarganda keskin qayta qurilish xususiyatiga ega boʻlib, bu jarayonni ilgari aniq matematik tasvirlash imkonsiz edi.
Fiziklar jarayonni tahlil qilish uchun Machine Learning va ilgʻor topologik maʼlumotlar tahlili usuli — persistent gomologiyalardan foydalanishdi. Sunʼiy intellekt magnit domenlarining mikroskopik tasvirlarini oʻrganib, erkin energiya raqamli xaritasini yaratdi. Bu xarita domenlar mikrotuzilmasi energiya holati oʻzgarishiga qarab qanday evolyutsiya qilishini yaqqol koʻrsatib berdi.
Tadqiqot natijasida olimlar magnit domenlari dinamikasini boshqaruvchi toʻrtta asosiy yashirin energetik toʻsiqni vizuallashtirishga muvaffaq boʻlishdi. Aniqlanishicha, labirint domenlarining murakkabligi domen devorlarining umumiy uzunligi ortishi bilan koʻpayib boradi. Ushbu kashfiyot kelajakda kamroq energiya yoʻqotadigan va qizimaydigan yuqori samaradorlikka ega elektr dvigatellari uchun yangi magnit materiallar yaratish imkonini beradi.
“Zamin”ni Telegramʻda oʻqing!
