Трамп ва Путин Украинадаги урушни тугатиш бўйича мулоқот ўтказди

Кеча, 12 февраль куни АҚШ ва Россия президентлари Украинадаги урушни тугатиш бўйича телефон орқали мулоқот ўтказди. Бу икки томон ҳам тасдиқлаган биринчи расмий телефон қўнғироғи ҳисобланади. Трамп Путин билан гапи бир жойдан чиққани, энди тинчлик музокараларини зудлик билан бошлаш кераклигини айтди. Шу куни у президент Зеленскийга ҳам қўнғироқ қилди.

12 февраль куни АҚШ президенти Доналд Трамп ҳамда Россия президенти Владимир Путин телефон орқали гаплашди. Бу икки томон ҳам тасдиқлаган биринчи расмий мулоқотдир. Ҳозиргача Трамп бир неча бор Путин ва унинг жамоаси билан мулоқот қилиб келаётганини айтса-да, Кремль буни рад этаётганди. Мулоқот мавзуси аниқ - Украина урушини тугатиш. Трамп сайлов олдидан Украинадаги урушни 1 кунда тугатаман дея ўта популистик ваъда бериб, буни уддалай олмаган бўлса-да, аста-секин томонлар музокара столига қараб йўл олмоқда.

Трампнинг матбуотга айтишича, икки президент ҳам миллионлаб одамларнинг ўлимига сабаб бўлган бу қирғинбарот урушни тўхтатишга рози. Зудлик билан музокараларни бошлашга Путин кўнган. Россия президентининг матбуот котиби Дмитрий Песковга кўра, Путиннинг Трамп билан суҳбати қарийб бир ярим соат давом этган. Давлат раҳбарлари Россия ва АҚШ фуқароларининг алмашинувига боғлиқ масалаларни ҳам муҳокама қилди, Трамп Америка томони эришилган барча келишувни бажаришига ишонтирди, дея қўшимча қилади Песков.

“Украинадаги вазиятни ҳал этиш мавзуси муҳокама қилинди. Президент Трамп жанговар ҳаракатларни тезроқ тугатиш ва муаммоларни тинч йўллар билан ҳал этиш ҳақида гапирди. Ўз навбатида президент Путин можаронинг бирламчи сабабларини бартараф этиш зарурлигини эслатиб, Трампнинг узоқ муддатли келишувга тинчлик музокаралари орқали эришиш мумкинлиги борасидаги фикрига қўшилди», — дейди Песков.

Путин мамлакатларнинг биргаликда ишлайдиган вақти келгани ҳақидаги Трампнинг фикрини қўллаб-қувватлади, дея қўшимча қилади Кремль расмийси.

Трамп Truth Social’га телефон мулоқоти ҳақида ёзаркан, биз биргаликда ишлашга, ташриф билан бир-биримизнинг давлатимизга боришга келишиб олдик. Тегишли жамоаларимиз Россия-Украина урушини ҳал этиш бўйича музокараларни бошлайди. Биз буни Украина президенти Володимир Зеленскийга қўнғироқ қилиб, бўлиб ўтган суҳбатдан хабардор қилишдан бошлаймиз, мен ҳозир шу ишни қиламан», деб ёзди.

Украина президенти офисининг маълум қилишича, Трамп кеча, 12 февраль куни Володимир Зеленский билан ҳам телефон орқали мулоқот қилган. Бироқ суҳбат тафсилотлари ошкор этилмаган.

Трампнинг сўзларига кўра, у АҚШ давлат котиби Марко Рубио, Миллий разведка бошқармаси директори Жон Ретклифф, миллий хавфсизлик бўйича маслаҳатчи Майкл Уолс ва махсус вакил Стив Уиткоффга музокараларга раҳбарлик қилишни топширган.

Кремлга кўра, мулоқот давомида Яқин Шарқдаги вазиятни ҳал этиш, Эрон ядровий дастури, шунингдек, иқтисодий соҳадаги Россия—Америка муносабатлари ҳам муҳокама қилинган. «Путин ва Трамп ўзаро мулоқотларни давом эттиришга, жумладан, учрашув ташкиллаштиришга келишиб олди», — дейди Дмитрий Песков.

Президент Трамп ва Путиннинг уруш муҳокамасига бағишланган учрашуви қаерда бўлиши кенг муҳокамада эди. Трамп бу мулоқот Саудия Арабистонида ўтишини гапирди. Оқ уйда журналистлар билан мулоқот қилган Трамп бу учрашув Саудия Арабистонида бўлиб ўтади, деди.

«Биз Саудия Арабистонида учрашамиз», — дея АҚШ давлат раҳбарининг сўзларидан иқтибос келтиради AFP агентлиги.

Журналистлар билан суҳбатда Трамп, шунингдек, Украинанинг НАТОга аъзо бўлишини мақсадга мувофиқ деб ҳисобламаслигини қўшимча қилди. Унинг фикрича, Киев Россия назорати остида бўлган барча ҳудудларни қайтариб ололмайди.

Трамп аввалррқ The New York Post’га берган интервьюсида Путин билан бўлган суҳбат ҳақида гапирганди. АҚШ президентининг айтишича, Путин жанг майдонида аскарларнинг ўлимига «ҳақиқатан ҳам бефарқ эмас».

Россия президенти матбуот котиби Дмитрий Песковнинг маълум қилишича, суҳбат чоғида Россия етакчиси Доналд Трампни Москвага ташриф буюришга ростдан ҳам таклиф қилган. “Замин” янгиликларини “Telegram”да кузатиб боринг