"Реал Мадрид" бош мураббийи Карло Анчелотти Испанияда солиқ фирибгарлиги билан боғлиқ иш доирасида судда кўрсатма берди. Итальян мутахассиси 2014-2015 йилларда 1,2 миллион евро миқдоридаги солиқни тўламасликда айбланмоқда.
Прокуратуранинг даъвоси
Мадрид прокуратураси Анчелоттига 4 йил 9 ой қамоқ жазоси ва 3,1 миллион евро жарима талаб қилмоқда. Айблов хулосасига кўра, у Испанияда солиқ резиденти бўлишига қарамай, фақат "Реал"дан олган маошини декларация қилган, аммо имидж ҳуқуқларидан тушган даромадни яширган.
Анчелоттининг умумий солиқ қарзи 1 217 958 евро, жарима миқдори 243 593 евро, фоизлар эса 47 298 евро этиб белгиланган.
Анчелоттининг позицияси
Суддаги сўзларига кўра, италиялик мураббий ҳуқуқий тартибларни тўла англамагани ва маслаҳатчилари билан гаплашганини, лекин тафсилотларга эътибор бермаганини билдирди:
"Реал" менга имидж ҳуқуқларини топширишни таклиф қилганда, мен инглиз маслаҳатчим билан боғландим, кейин эса тафсилотларга кирмадим. Ҳамма нарса қонуний деб ўйладим. Бу фирибгарлик деб баҳоланиши мумкинлигини билмагандим. Мен прокуратура менга қарши тергов олиб бораётгани ҳақида ҳеч қандай хабар олмаганман", – деди Анчелотти.
Суд жараёни ва кейинги қадамлар
Ҳозирча суд Анчелоттининг ҳимоясига оид якуний қарорни чиқармаган. Аммо агар у айбдор деб топилса, жамоат ишлари ёки молиявий жарима ўрнига ҳақиқий қамоқ жазоси қўлланилиши мумкин.
Суд жараёнидан сўнг, Анчелотти суд биносини тарк этиб, журналистларга шундай деди: "Ҳаммаси жойида."
"Реал Мадрид" мураббийининг тақдири ҳали ҳам ҳал қилинмаган, суд жараёнлари давом этмоқда. “Замин” янгиликларини “Telegram”да кузатиб боринг
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
